Májilis Qazaqstan men Reseı arasyndaǵy temirjoldaǵy tasymaldy rásimdeýge ózgerister engizetin qujatty maquldady
ASTANA. QazAqparat - Búgin Parlament Májilisiniń jalpy otyrysynda palata depýtattary «2016 jylǵy 15 tamyzdaǵy Qazaqstan Respýblıkasynyń Úkimeti men Reseı Federatsııasynyń Úkimeti arasyndaǵy Reseı temir jol ýchaskeleri boıynsha jáne Qazaqstan Respýblıkasynyń aýmaǵynda ornalasqan Reseı Federatsııasynyń temir jol ýchaskeleri boıynsha tasymaldaý tólemderin tóleý jáne júk tasymaldaryn rásimdeý tártibi týraly kelisimge ózgerister men tolyqtyrýlar engizý týraly hattamany ratıfıkatsııalaý týraly» zań jobasyn maquldady.
Hattamaǵa sáıkes, atalǵan kelisim reseılik temirjoldyń Ozınkı, Aqsaraı ІІ, Qulyndy, Zolotaıa Sopka túıisý pýnktterinen júkterdi tasymaldaý kezinde qazaqstandyq temirjolda jáne qazaqstandyq temirjoldyń Nıkeltaý, Tobyl, Presnogorkov, Qyzyl tý túıisý pýnktterinen júkterdi tasymaldaý kezinde reseılik temirjolda tólemderin tóleý tártibin reglamentteıtin baptar alynyp tastalady.
«Bul 2009 jyly Qazaqstan men Reseı arasynda atalǵan stansalarda ornalasqan ýchaskelermen almasýyna jáne taraptardyń memelkettik shekarasynyń bólýine baılanysty bolyp tabylady. Zańdy qabyldaý teris ekonomıkalyq, áleýmettik saldardy boldyrmaıdy», - deıdi Investıtsııalar jáne damý mınıstri Áset Isekeshev.
Májilis maquldaǵan zań jobasy Parlament Senatyna joldanady.
