Májilis Qazaqstan men Brazılııa arasyndaǵy quqyqtyq kómek qujatyn maquldady
Shartqa 2018 jyly Nur-Sultan qalasynda qol qoıyldy. Bul halyqaralyq qujatqa eki el arasynda qylmystyq sala boıynsha quqyqtyq kómektiń negizderi, tártibi jáne basqa da qadamdar kózdelgen. Shartta kúdikti men aıyptalýshynyń kinásin dáleldeý úshin qajetti tergeý amaldaryn júrgizý joldary, ózara quqyqtyq kómek kórsetý tártibi men jaǵdaılary, tıisti saraptamalar júrgizý, aıǵaqtar alý men bettestirý júrgizý, qylmystyq aktıvterge tyıym salý jáne olardy elge qaıtarý eskerilgen.
«Kómek kórsetýden bas tartý negizderi bekitilgen. Jalpy, úlgili negizde jasalǵan. Mundaı shart 29 elmen bekitildi, onyń ishinde AQSh, Ulybrıtanııa, Bolgarııa bar. Sonymen qatar basqa da memlekettermen atalǵan shartqa qol qoıýdy qarastyryp jatyrmyz», - dedi QR Bas prokýrorynyń orynbasary Marat Ahmetjanov.
Budan buryn habarlanǵandaı, jalpy otyrysta palata depýtattary «Qazaqstan men Brazılııa arasyndaǵy adamdardy ustap berý týraly shartty ratıfıkatsııalaý týraly» zań jobasyn maquldady.
Shart izdeýde júrgen adamdardy qylmystyq jaýapqa tartý jáne sot úkimin oryndaý úshin ekstradıtsııalaý máselelerin sheshedi.
«Eger adam Qazaqstanda qylmys jasap, Brazılııada jasyrynyp júrse, ol qamaýǵa alynady jáne Qazaqstanǵa ustap beriledi. Dál osylaısha qylmysker elimizde jasyrynyp júrse, biz Brazııalııa tarapyna adamdy ekstradıtsııalaýǵa mindetti bolamyz. Qujatta ustap berý jáne odan bas tartý negizderi bekitilgen», - dedi M. Ahmetjanov.
