Májilis Qazaqstan men BAÁ arasyndaǵy qosarlanǵan salyq salýdy boldyrmaý týraly kelisimdi maquldady
ASTANA. 26 maýsym. QazAqparat - Búgin Parlament Májilisiniń jalpy otyrysynda palata depýtattary «Qazaqstan Respýblıkasynyń Úkimeti men Birikken Arab Ámirlikteriniń Úkimeti arasyndaǵy qosarlanǵan salyq salýdy boldyrmaý jáne
salyq salýdan jaltarýdyń aldyn alý týraly Konventsııany jáne oǵan Hattamany ratıfıkatsııalaý týraly» zań jobasyn maquldady.
Konventsııanyń maqsaty - eki el arasyndaǵy ekonomıkalyq qatynastardy ınvestıtsııalarǵa qolaıly jaǵdaı jasaý jolymen nyǵaıtý jáne damytý bolyp tabylady. Sonymen birge, bireýiniń nemese eki Kelisýshi Memleketterdiń rezıdent jeke jáne zańdy tulǵalarynyń tabystaryna qosarlanǵan salyq salýdy joıýdy kózdeıdi.
Konventsııa salyqtyń barlyq túrine qoldanylady. Keıbir dıvıdentterge, paıyzdarǵa jáne roıaltıge tabystyń paıda bolý memleketinde tómendetilgen mólsherleme boıynsha salyq salynatyn erejeler qarastyrylǵan.
Konventsııanyń 5-babyna sáıkes, kelisýshi memleketterdiń birindegi zańdy tulǵa-rezıdent, eger ol turaqty mekeme qalyptastyrmaı-aq kásipkerlik qyzmetti júzege asyratyn bolsa, onda basqa kelisýshi memlekettegi tabys salyǵyn tóleýden bosatylý múmkindigi qarastyrylady.
Májilis maquldaǵan zań jobasy Parlament Senatyna joldanady.
