Májilis qaýipti qaldyqtarǵa qatysty qujatty maquldady

NUR-SULTAN. QazAqparat – Parlament Májilisiniń jalpy otyrysynda «Eýrazııalyq ekonomıkalyq odaqtyń kedendik aýmaǵy arqyly qaýipti qaldyqtardy transshekaralyq ótkizý týraly kelisimdi ratıfıkatsııalaý týraly» zań jobasy maquldandy, dep habarlaıdy QazAqparat tilshisi.

Kelisim 2014 jylǵy 29 mamyrdaǵy Eýrazııalyq ekonomıkalyq odaq týraly shart aıasynda jasalǵan halyqaralyq shart bolyp sanalady. Eýrazııalyq ekonomıkalyq odaq týraly shart osy EAEO-ǵa múshe memleketterdiń úshinshi eldermen saýda-sattyqta tarıftik emes retteýdiń biryńǵaı sharalaryn qoldanýyn kózdeıdi.

«Qazaqstanda qaýipti qaldyqtardy ákelý, áketý jáne tranzıtin zańnamalyq retteý Bazel konventsııasy jáne Ekologııalyq kodeks normalarymen júzege asyrylady. Eýrazııalyq ekonomıkalyq odaqqa kirmeıtin elderge qatysty lıtsenzııalyq tártip qoldanylady. Lıtsenzııa berýdi mınıstrlik 2019 jyldan bastap, ıaǵnı ol qurylǵannan bastap júzege asyrady», - dedi QR Ekologııa, geologııa jáne tabıǵı resýrstar mınıstri Serikqalı Brekeshev.

Onyń aıtýynsha, jeke tulǵalardyń jeke paıdalanýy úshin qaldyqtardy transshekaralyq ótkizýine tyıym salynady.

«Kelisim talaptaryn saqtaý Eýrazııalyq ekonomıkalyq odaqqa múshe memleketter arasynda qaýipti qaldyqtardy ótkizýdiń biryńǵaı tártibin belgileýge múmkindik beredi, sondaı-aq qaýipti qaldyqtardy ekologııalyq negizdelgen túrde joıýǵa jáne qaıta óńdeýge, qorshaǵan ortanyń lastanýynyń aldyn alýǵa alyp keledi», - dedi mınıstr.

Osylaısha, taraptar osy Kelisimge jáne Taraptar memleketteriniń zańnamasyna sáıkes, qaldyqtardyń transshekaralyq ornynyń aýystyrylýyn baqylaýdy jáne qadaǵalaýdy júzege asyratyn bolady. Taraptar qaldyqtardy kómý jáne zalalsyzdandyrý maqsatynda olardy transshekaralyq tasymaldaýyna jol bermeıdi.