Májilis Qaýipsizdik Keńesi týraly zań jobasyn birinshi oqylymda maquldady
ASTANA. QazAqparat - Parlament Májilisiniń jalpy otyrysynda palata depýtattary «Qazaqstan Respýblıkasynyń Qaýipsizdik Keńesi týraly» Zań jobasyn birinshi oqylymda maquldady, dep habarlaıdy QazAqparat tilshisi.
«Qazaqstan Respýblıkasynyń Qaýipsizdik Keńesi týraly» Zań jobasy «Qazaqstan Respýblıkasynyń Prezıdenti týraly» Konstıtýtsııalyq zańynyń otyz úshinshi babyna sáıkes ázirlendi. Zań jobasy QR Qaýipsizdik Keńesiniń quqyqtyq mártebesin, quzyretin jáne qyzmetiniń uıymdastyrylýyn aıqyndaıdy. Osylaısha, Qaýipsizdik Keńesin úılestirýshi konstıtýtsııalyq organ retinde taný usynylady», - dedi QR Ádilet mınıstri Marat Beketaev.
Jalpy, zań jobasy úsh taraýdan turady. Birinshi taraý Qaýipsizdik Keńesiniń quqyqtyq mártebesin, qyzmetiniń negizderin, mindetteri men fýnktsııalaryn aıqyndaıdy.
«Qaýipsizdik Keńesiniń mindetterine: eldiń ulttyq qaýipsizdigin, qorǵanys qabiletiligin qamtamasyz etý boıynsha memlekettik saıasattyń baǵyttaryn qaraý; sol baǵyttar boıynsha memlekettik organdar men uıymdardyń qyzmetin úılestirý jatady. Sonymen qatar, Qazaqstan Respýblıkasynyń zańnamasyna jáne Qaýipsizdik Keńesi Tóraǵasynyń sheshimderine sáıkes, basqa da mindetter qarastyrylady», - dedi M. Beketaev.
Al ekinshi taraý Qaýipsizdik Keńesiniń quramyn, onyń Tóraǵasy men músheleriniń ókilettigin, Qaýipsizdik Keńesiniń qyzmetin belgileıdi.
Atap aıtqanda, kelesi ókilettikterdi bekitý usynylady:
- Qaýipsizdik Keńesiniń qyzmetin basqarýdy júzege asyrý; onyń otyrystary men jedel keńesterin shaqyrý; Qaýipsizdik Keńesi týraly erejeni bekitý; zańnamada kózdelgen ózge de ókilettikterdi júzege asyrý.
Qaýipsizdik Keńesiniń qyzmetin aqparattyq-taldamalyq jáne uıymdastyrýshylyq jaǵynan qamtamasyz etýdi Qaýipsizdik Keńesiniń Tóraǵasyna baǵynatyn jáne esep beretin Qaýipsizdik Keńesiniń Apparaty júzege asyrady.
«Úshinshi taraý Qaýipsizdik Keńesi men Qaýipsizdik Keńesi Apparatynyń qyzmetin qarjylandyrý máselelerin, sondaı-aq zańnyń kúshine ený tártibin retteıdi. Qaýipsizdik Keńesine jáne Qaýipsizdik Keńesiniń Apparatyna arnalǵan shyǵystar zańnamada belgilengen tártippen respýblıkalyq bıýdjetten qarjylandyrylady», - dep túıdi sózin Marat Beketaev.
