Májilis Kaspıı teńizindegi shekaraǵa qatysty qujatty maquldady
Zań jobasy bıylǵy 2 jeltoqsanynda birinshi oqylymda maquldandy.
Onyń maqsaty - Kaspıı teńiziniń quqyqtyq mártebesi týraly Konventsııanyń erejelerin ulttyq zańnamaǵa ımplementatsııalaý.
«Ótken jyly Qazaqstan joǵaryda atalǵan Konventsııany ratıfıkatsııalady, ol boıynsha jumys 20 jyldan asa júrgizildi. Kaspıı mańyndaǵy barlyq elderdiń memlekettik organdarynyń, sarapshylary men iskerlik toptarynyń qatysýmen aýqymdy kelissózder jumysy iske asyryldy. Tuńǵysh Prezıdent Nursultan Ábishuly Nazarbaevtyń osy halyqaralyq qujatty qabyldaýǵa qosqan jeke zor úlesin atap ótkim keledi. Ol Konventsııanyń negizgi erejeleriniń biri – Kaspıı teńizin beıbitshilik pen tatý kórshilik aýmaǵyna aınaldyrý dep atap kórsetti», - dedi depýtat Baqtyqoja Іzmuhambetov.
Onyń aıtýynsha, zań jobasynda eni 15 teńiz mıli bolatyn aýmaqtyq sýlar belgilenedi, olardyń syrtqy shekaralary memlekettik mártebege ıe bolady. Aýmaqtyq sýlarǵa 10 mıldik balyq aýlaý aımaqtary qosylady, onda árbir memleket kásipshilikke arnalǵan aıryqsha quqyqtarǵa ıe. Balyq aýlaý kelisilgen ulttyq kvotalar negizinde júzege asyrylatyn bolady.
«Balyq aýlaý aımaqtary sheginen tys ortaq sý keńistigi saqtalady. Memlekettik teńiz shekaralarynan tys jaǵalaýdaǵy elderdiń týlaryn kóterip júzetin kemeler úshin teńizde júzý erkindigi qoldanylatyn bolady. Kaspıı mańy memleketteri balyq aýlaý aımaǵynda jáne ortaq sý keńistiginde sý bıologııalyq resýrstaryn qorǵaýdy birlesip júzege asyrady», - dedi Májilis depýtaty.
Zań jobasymen jumys isteý barysynda jumys toby mynadaı túzetýler engizdi:
1) «kontınentaldiktik qaırań» uǵymyn pysyqtaýǵa baǵyttalǵan túzetýler jáne de endi bul uǵym Kaspıı teńiziniń qazaqstandyq sektoryn qamtıdy. Bul eki uǵymda qaıshylyqtar bolmaýy úshin qoldanystaǵy zańnamaǵa sáıkes keltirý maqsatynda jasaldy, óıtkeni is júzinde olar bir nárseni bildiredi;
2) Qazaqstan Respýblıkasynyń aýmaqtyq sýlarynyń mólsherin naqtylaýǵa;
3) «sý bıologııalyq resýrstarynyń zańsyz, habarlandyrylmaǵan jáne rettelmegen kásipshiligi» uǵymyn pysyqtaýǵa;
4) Ulttyq qaýipsizdik komıteti Shekara qyzmetiniń quqyqtary men mindetterin qaıta qaraýǵa baǵyttalǵan túzetýler.
«Konventsııa normalaryn ımplementatsııalaý maqsatynda Qazaqstan Respýblıkasynyń Sý kodeksine, Qazaqstan Respýblıkasynyń «Saýda maqsatynda teńizde júzý týraly», «Syrtqy barlaý týraly» Zańdaryna tıisti túzetýler engizildi», - dedi Baqtyqoja Іzmuhambetov.