Májilis Kásipkerlik kodeksin birinshi oqylymda maquldady
ASTANA. QazAqparat - Búgin QR Parlamenti Májilisiniń jalpy otyrysynda palata depýtattary Kásipkerlik kodeksiniń jobasy birinshi oqylymda maquldandy.
Atalǵan kodeks jobasy memlekettik retteý men bıznesti qoldaýǵa baılanysty týyndaıtyn qoǵamdyq qatynastardy retteýdi qarastyrady.
«Bul joba klassıkalyq kodeks emes, shoǵyrlandyrylǵan kodeks, onda nysanaly baǵyttan týyndaıtyn normalar júıelengen. Kásipkerlik kodeks jobasyn ázirleý barysynda biz onyń Azamattyq kodeks normalarymen araqatynasynyń ońtaıly nusqasyn qalyptastyrýdy muqııat qarastyrdyq», - dedi Ádilet mınıstri Berik Imashev.
Onyń aıtýyna qaraǵanda, Kásipkerlik kodeks jobasy jeke quqyq pen normalar básekelestiginiń dýalızmin týyndatpaıdy jáne kásipkerlik sýbektileri men memlekettiń ózara qarym-qatynasyna, onyń ishinde memlekettik retteý men kásipkerlikti qoldaýǵa baılanysty týyndaıtyn qoǵamdyq qarym-qatynastardy retteýdi qarastyrady.
Bul rette, kodeks jobasynda 19 qaǵıdat aıqyndalǵan, solardyń negizinde kásipkerlik sýbektileri men memleket ózara áreket ete alady. Sonyń ishinde kodekstiń derbes bólimi kásipkerlik pen memlekettiń ózara is-qımyly máselelerine arnalyp otyr. Atap aıtqanda, kásipkerlik sýbektileriniń norma jasaýǵa qatysýy, kásipkerlik salasyndaǵy memlekettik tapsyrys, memlekettik-jeke menshik seriktestik, kásipkerliktiń áleýmettik jaýapkershiligi men kásipkerlikti memlekettik retteý, jeke kásipkerlikti memlekettik qoldaý sharalary qamtylǵan.
«Tutastaı alǵanda Kásipkerlik kodeksiniń jobasyna bıznesti retteıtin fýnktsıonaldy zańnamalar shoǵyrlandyryldy. Bul rette kásipkerliktiń salalyq túri burynǵysynsha arnaıy zańnamalarmen retteletin bolady. Sonymen qatar, kássipkerlik pen memlekettik sýbektiler ózara árekettesetin bazalyq biryńǵaı qaǵıdattar da aıqyndaldy. Sonyń ishinde birshama qaǵıdattar alǵash ret qoldanylmaq», - deıdi mınıstr B. Imashev.
Onyń sózine qaraǵanda, memlekettiń kásipkerlikti retteý formalary men quraldary júıelendirilgen. Atap aıtqanda, ekonomıkalyq básekelestik, ruqsat berý men eskertýler, baǵany memlekettik retteý, kásipkerlikke memlekettik baqylaý men qadaǵalaý sharalary qamtylǵan.
