Májilis kásipkerlik kepildikterin kúsheıtýge múmkindik beretin qujatty talqylaıdy

NUR-SULTAN. QazAqparat – Parlament Májilisiniń depýtattary «Qazaqstan Respýblıkasynyń keıbir zańnamalyq aktilerine reıderlikke qarsy kúresti kúsheıtý, kásipkerlik qyzmetti memlekettik organdar men laýazymdy adamdardyń zańsyz aralasýynan qorǵaý jáne baǵaly metaldardyń zańsyz aınalymyna kedergi keltiretin sharalardy kúsheıtý máseleleri boıynsha ózgerister men tolyqtyrýlar engizý týraly» zań jobasy boıynsha talqylaýdy bastaıdy, dep habarlaıdy QazAqparat tilshisi.

«Bul zań jobasy parlament depýtattary tarapynan Memleket basshysynyń 2019 jylǵy jáne 2020 jylǵy Joldaýlaryn iske asyrý maqsatynda ázirlendi. Zań jobasymen eki kodeks pen eki eki zańǵa túzetýler kózdelgen», - dedi Májilistiń Zańnama jáne sot-quqyqtyq reforma komıtetiniń tóraǵasy, depýtat Qanat Mýsın palatanyń jalpy otyrysynda.

Onyń aıtýynsha, usynylatyn normalar reıderlikpen jáne quqyq qorǵaý men baqylaýshy organdardyń kásipkerlerge qatysty zańsyz is-áreketterimen kúresti kúsheıtý, sondaı-aq baǵaly metaldardyń zańsyz aınalymyna kedergi keltiretin sharalardy kózdeıdi.

«Bul túzetýler azamattardyń quqyqtaryn qorǵaýdy arttyrýǵa, prokýratýra qadaǵalaýyn kásipkerlerdiń ózekti máselelerin tıimdi sheshýge qaıta baǵyttaýǵa, olardyń qyzmetine zańsyz aralasýdan, bıznes sýbektilerin qylmystyq qýdalaý sheńberine tartýdan kásipkerlik kepildikterin kúsheıtýge múmkindik beredi. Komıtet bul zań jobasyn qaraýǵa jáne qorytyndy ázirleýge daıyn», - dedi depýtat.