Májilis kásipkerlerdiń jaǵdaıyn jaqsartatyn zań ázirleýde
ASTANA. QazAqparat - QR Parlamenti Májilisiniń Ekonomıkalyq reforma jáne óńirlik damý komıteti kásipkerlerdiń jaǵdaıyn jaqsarýǵa baǵyttalǵan zań jobasyn ázirleýde. Bul týraly búgin Májilis depýtaty Nurtaı Sabılıanov aıtty, dep habarlaıdy QazAqparat tilshisi.
Memleket basshysynyń Parlamenttiń 4-sessııasynda qoıǵan mindetterin talqylaýǵa arnalǵan «Nur Otan» partııasy fraktsııasynyń jınalysy barysynda Nurtaı Sabılıanov depýtattardyń nazaryn Ekonomıkalyq reforma jáne óńirlik damý komıtetiniń aǵymdaǵy jáne aldaǵy zańnamalyq jumysyna aýdardy.
«Birinshi, memlekettik satyp alýdy, memlekettik, kvazımemlekettik sektordaǵy satyp alýdy jeńildetý jáne tıimdiligin arttyrý boıynsha komıtette osyǵan baǵyttalǵan zań jobasy talqylanýda. Zań jobasy jemqorlyq táýekelderin azaıtýǵa, basym mindetterdi júzege asyrý úshin qarajatty bosatýǵa jáne bıznes ahýaldy jaqsartýǵa baǵyttalǵan. Sonymen qatar, zań jobasynda ortalyqtandyrylǵan qyzmet qaǵıdaty boıynsha biryńǵaı memlekettik satyp alý júıesin engizý, kvazımemlekettik sýbektilerine satyp alýdy ótkizýdiń biryńǵaı tásilderi men qaǵıdattaryn belgileý jáne ózge normalar qarastyrylǵan. Kásipkerlerdiń jaǵdaıyn jaqsartý úshin memlekettik satyp alý aqparattyq júıesin ulttyq kásipkerler aqparattyq júıesimen biriktirý de qarastyrylyp otyr», - dedi depýtat.
Onyń aıtýynsha, atalǵan zań jobasy boıynsha depýtattar túzetýler men usynystar engizdi. Olar bıznes ahýaldy jaqsartýǵa, bıýdjet qarajatyn tıimdi paıdalanýǵa, táýekelderdi azaıtýǵa baǵyttalǵan. Jáne de áleýetti ónim berýshilerge qoıylatyn biliktilik talaptaryn kúsheıtý, otandyq taýar óndirýshilerdi memlekettik satyp alýǵa qatysý kezinde qoldaý, memlekettik satyp alýdy júzege asyrý kezinde baǵa túsirýdi boldyrmaý, memlekettik satyp alýdy bir kózden alý tásili arqyly júzege asyrý negizdemesin alyp tastaý nemese naqtylaý máselesi qarastyrylyp otyr.
«Mundaı sharalardyń tıimdigin myna mysaldarmen de túsindirýge bolady. 2018 jyldyń 8 aıynyń ishinde 2 trln 580 mlrd teńgege memlekettik satyp alý sharty jasalǵan eken. Al eger biz oǵan kvazımemlekettik sektorlardyń satyp alýyn qosatyn bolsaq, bul 5 trln teńgege deıin ósedi. Sondyqtan da komıtet bul zań jobasyn jan-jaqty talqylap, osy aıdyń sońyna deıin birinshi oqylymǵa engizýge daıyn»,- dedi Nurtaı Sabılıanov.
