Májilis qarjy sektoryn retteý organy boıynsha zań jobasyn maquldady
NUR-SULTAN. QazAqparat - Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine qarjy naryǵyn retteý men damytý jáne mıkroqarjylyq qyzmet máseleleri boıynsha ózgerister men tolyqtyrýlar engizý týraly» zań jobasy ekinshi olqylymda maquldandy, dep habarlaıdy QazAqparat.
Zań jobasynyń negizgi maqsaty - qarjy naryǵyn retteý, baqylaý jáne qadaǵalaý fýnktsııalaryn bólý, tutynýshylyq nesıeleý táýekelderin shekteý boıynsha tujyrymdamalyq tásilderdi ázirleý.
Osy qujat aıasynda 10 kodeks pen 30 zańǵa ózgerister men tolyqtyrýlar engiziledi.
Zań jobasy qarjy salasyna qatysty birqatar mindetterdi sheshýge baǵyttalǵan. Osy oraıda Memleket basshysyna tikeleı baǵynatyn jáne esep beretin ári respýblıkalyq bıýdjet qarajaty esebinen qarjylandyrylatyn qarjy sektoryn retteýdiń táýelsiz organyn qurý; QR Ulttyq banki men jańa rettegish arasynda quzyretterdiń arajigin ajyratý; tutynýshylyq nesıeleý naryǵynda retteýshilik tórelik pen júıelik problemalardy joıý; depozıtterge kepildik berý júıesin jetildirý eskerilgen.
Eske sala keteıik, 22 mamyrda atalǵan zań jobasy QR Parlamenti Májilisiniń jalpy otyrysynda birinshi oqylymda maquldanǵan edi.
Bul rette Qazaqstanda qarjy naryǵyn retteıtin jańa agenttik qurý josparlanyp otyr.
Jańa agenttikti Ulttyq bank sııaqty QR Prezıdentine tikeleı baǵyný jáne respýblıkalyq bıýdjet esebinen qarjylandyrý usynyldy. Sonymen qatar qyzmetshilerdiń mártebesi Ulttyq bank qyzmetshileriniń mártebesindeı bolady. UB men jańa agenttiktiń qyzmeti tyǵyz úılesedi. Qarjylyq turaqtylyqty qamtamasyz etý maqsatynda Ulttyq bank pen agenttik Qarjylyq turaqtylyq jónindegi keńestiń qyzmeti sheńberinde ózara is-qımyl jasaıdy.
Jaqynda QR Ulttyq bank tóraǵasy Erbolat Dosaev jańadan qurylatyn agenttik Almatyda ornalasatynyn aıtty.
