Májilis qarjy pıramıdalarynyń qyzmetine tyıym salatyn zań jobasyn maquldady

ASTANA. 5 maýsym. QazAqparat - Búgin Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine qarjylyq (ınvestıtsııalyq) pıramıdalardyń qyzmetine qarsy is-qımyl máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.

Zań jobasy Memleket basshysynyń tapsyrmasyna oraı ázirlengen. Bul rette qujat arqyly qarjylyq pıramıdalardyń jolyn kesý, ony boldyrmaý boıynsha sharalar keshenin qabyldaý, bastysy, Qazaqstan aýmaǵynda olardyń qyzmetine zańnamalyq deńgeıde tyıym salý kózdeledi. Atap aıtqanda, qarjy pıramıdalarynyń qyzmetin uıymdastyrýǵa, ony basqarýǵa qatysty qylmystyq jaýapkershilik qamtylady. Sondaı-aq qarjylyq (ınvestıtsııalyq) pıramıdalardyń uǵymyn naqtylaý qarastyrylady. Ondaı qyzmetterdiń jarnamalanýyna zańnamalyq negizben tyıym salynatyn bolady.

QR Bas prokýrorynyń orynbasary Iogan Merkeldiń aıtýynsha, álemde qarjy pıramıdalarynyń qyzmetine qatysýshylar sany shamamen 10-15 mıllıon adamdy quraıdy. Onyń ishinde Qazaqstannyń ózinde «MMM» atalatyn qarjy pıramıdalarynyń 8 keńsesi qyzmet etken. Úsh jyl ishinde elimizdiń quqyq qorǵaý organdary bundaı uıymdardyń zańsyz qyzmetine qatysty 61 is qozǵady.

Birinshi oqylymda maquldanǵan zań jobasy, ekinshi oqylymǵa ázirleý úshin bas komıtetke tapsyrylady.