Májilis qarjy pıramıdalarynyń qyzmetine tosqaýyl qoıatyn qujatty maquldady
ASTANA. 20 qarasha. QazAqparat - Búgin Májilistiń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine qarjylyq (ınvestıtsııalyq) pıramıdalardyń qyzmetine qarsy is-qımyl máseleleri boıynsha ózgerister men tolyqtyrýlar engizý týraly» zań jobasyn ekinshi oqylymda maquldady.
Zań jobasy Memleket basshysynyń tapsyrmasyna oraı ázirlengen. Bul rette qujat arqyly qarjylyq pıramıdalardyń jolyn kesý, ony boldyrmaý boıynsha sharalar keshenin qabyldaý, bastysy, Qazaqstan aýmaǵynda olardyń qyzmetine zańnamalyq deńgeıde tyıym salý kózdeledi. Atap aıtqanda, qarjy pıramıdalarynyń qyzmetin uıymdastyrýǵa, ony basqarýǵa qatysty qylmystyq jaýapkershilik qamtylady. Sondaı-aq qarjylyq (ınvestıtsııalyq) pıramıdalardyń uǵymyn naqtylaý qarastyrylady. Ondaı qyzmetterdiń jarnamalanýyna zańnamalyq negizben tyıym salynatyn bolady.
Resmı organdardyń málimetine qaraǵanda, álemde qarjy pıramıdalarynyń qyzmetine qatysýshylar sany shamamen 10-15 mıllıon adamdy quraıdy. Onyń ishinde Qazaqstannyń ózinde «MMM» atalatyn qarjy pıramıdalarynyń 8 keńsesi qyzmet etken. Úsh jyl ishinde elimizdiń quqyq qorǵaý organdary bundaı uıymdardyń zańsyz qyzmetine qatysty 61 is qozǵady.
Májilis maquldaǵan zań jobasy Parlament Senatyna joldanady.
