Májilis qaryz eńbekti retteý máselesi boıynsha ózgeristerdi maquldady
NUR-SULTAN. QazAqparat - Búgin QR Parlamenti Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine qaryzdyq eńbekti retteý máseleleri boıynsha ózgerister men tolyqtyrýlar engizý týraly» QR zańynyń jobasy birinshi oqylymda maquldandy, dep habarlaıdy QazAqparat tilshisi.
QR Parlamentiniń bir top depýtaty bastamashylyq jasaǵan zań jobasy qaryzdyq eńbek salasyn quqyqtyq retteýdiń bolmaýyna baılanysty azamattardyń Qazaqstan Respýblıkasy Konstıtýtsııasynyń 24-babymen kepildik berilgen quqyqtaryn buzýshylyqty joıý jáne aldyn alý maqsatynda ázirlendi.
Májilis depýtaty Qanat Mýsınniń atap ótýinshe, zań jobasynyń normalary qaryzdyq eńbek salasynda eńbek etýshi azamattardy áleýmettik qorǵaýǵa, sondaı-aq jumys berýshiler tarapynan olardyń eńbek úshin syıaqy alý quqyǵy saqtalýyn, eńbek jaǵdaılaryn qaýipsizdik jáne gıgıena talaptaryna sáıkes qamtamasyz etýge baǵyttalǵan.
Zań jobasynda QR Eńbek kodeksine eńbek qatynastary júıesindegi qaryzdyq eńbek salasynyń obektileri men sýbektilerin aıqyndaý bóliginde jańa uǵymdar engizý usynylady. Personaldy berý jónindegi qyzmetti júzege asyratyn zańdy tulǵalar, onyń ishinde jumyspen qamtýdyń jekeshe agenttikteri «jiberýshi tarap» retinde aıqyndalǵan, qaryzdyq eńbekti paıdalanatyn zańdy jáne jeke tulǵalar «qabyldaýshy tarap» retinde aıqyndalǵan.
Sondaı-aq «qabyldaýshy taraptyń jumyskerleri», «personaldy berý» degen jańa anyqtamalar usynylady, «eńbek mindetteri», «eńbek qyzmetine baılanysty jazataıym oqıǵa» uǵymdaryna naqtylaý sıpatyndaǵy ózgerister engiziledi.
Budan basqa, Eńbek kodeksin: qabyldaýshy jáne jiberýshi taraptar jumyskeriniń quqyqtary men mindetterin; qabyldaýshy tarap jumyskerleriniń negizgi jalaqysynan tómen emes bolyp belgilenetin negizgi jalaqy mólsherin; taraptardyń quqyqtary, mindetteri men jaýapkershiligi, sondaı-aq qaryzdyq jumyskerdiń eńbek qyzmeti ýaqytyndaǵy jazataıym oqıǵalar kezindegi tergep-tekserý tártibin; personaldy berý jónindegi qyzmetterdi kórsetý boıynsha qyzmetti júzege asyrý tártibin retteıtin normalarmen tolyqtyrý usynylyp otyr.
Sonymen qatar, Zań jobasynda Qazaqstan Respýblıkasynyń Kásipkerlik kodeksine jáne «Qyzmetker eńbek (qyzmettik) mindetterin atqarǵan kezde ony jazataıym oqıǵalardan mindetti saqtandyrý týraly», «Halyqty jumyspen qamtý týraly» Qazaqstan Respýblıkasynyń Zańdaryna ózgerister men tolyqtyrýlar engizý usynylady.
