Májilis Qarsy barlaý qyzmeti týraly zań jobasyn birinshi oqylymda maquldady
ASTANA. QazAqparat - Búgin QR Parlamenti Májilisiniń jalpy otyrysynda palata depýtattary «Qarsy barlaý qyzmeti týraly» zań jobasyn birinshi oqylymda maquldady, dep habarlaıdy QazAqparat.
Zań jobasy QR Qaýipsizdik Keńesiniń 2016 jylǵy 10 maýsymdaǵy otyrysynyń hattamasyn oryndaý úshin ázirlendi. Jobada qarsy barlaý qyzmetiniń qaǵıdattary men mindetteri, QR Prezıdentiniń osy saladaǵy ókilettikteri, qarsy barlaý qyzmetin júzege asyratyn organdardyń tizbesi, olardyń quqyqtary men mindetteri, sondaı-aq paıdalanylatyn negizgi uǵymdar kórsetilgen.
«Tanystyrylyp otyrǵan zań jobasy qarsy barlaý qyzmetiniń quqyqtyq negizderin zańnamalyq deńgeıde bekitedi. Sonymen birge onyń negizine qarsy barlaý organdary men qoǵamnyń ózara is-qımylynyń áriptestik modeli eskerilgen»,-dedi zań jobasyn tanystyrý kezinde QR Ulttyq qaýipsizdik komıteti tóraǵasynyń orynbasary Marat Qalqabaev.
Atap aıtqanda, qarsy barlaý qyzmetin júzege asyrýdy reglamentteý maqsatynda osy qyzmetti iske asyrý úshin tıisti negizder, sonymen júrgiziletin qarsy barlaý sharalarynyń tizbesi belgilendi. Bul rette Memlekettik kúzet qyzmetiniń jedel qamtamasyz etý nysandaryndaǵy jáne kúzet is-sharalary ótetin aımaqtaǵy qarsy barlaý şaralary birlesken buıryqpen aıqyndalǵan tártippen Memlekettik kúzet qyzmetiniń kelisimi boıynsha ótkiziledi.
