Májilis ıslamdyq qarjylandyrý boıynsha Senatqa kelisim berdi

ASTANA. QazAqparat - Búgin Parlament Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine saqtandyrý jáne ıslamdyq qarjylandyrý máseleleri boıynsha ózgerister men tolyqtyrýlar engizý týraly» zań jobasyna Senat engizgen ózgeristerdi talqylady. Nátıjesinde Májilis senatorlar túzetýlerine kelisim berip, qujatty qabyldady.

Eske salaıyq, atalǵan zań jobasynyń maqsaty ıslamdyq saqtandyrýdy engizý, ıslam bankteriniń qyzmetine edáýir qolaıly jaǵdaılar jasaý, saqtandyrý tólemderine kepildik berý júıesiniń turaqtylyǵy men qarjylyq ortalyǵyn qamtamasyz etý bolyp tabylady. Sonymen qatar, zań jobasymen qyzmetkerdi eńbek mindetterin oryndaý kezinde jazataıym oqıǵalardan mindetti saqtandyrý jolymen Qazaqstanda tolyqqandy ıslamdyq qarjylandyrý júıesin qurý qarastyrylady.

Bul rette zań jobasymen ıslamdyq qarjylandyrý júıesin odan ári damytý úshin ıslamdyq saqtandyrýdy engizý qarastyrylyp otyr. Ádettegi saqtandyrý ıslamnyń saqtandyrý qaǵıdattaryna qaıshy keletini aıqyn. Bul ıslamdyq qarjy júıesiniń qatysýshylarynyń táýekelderin jabýǵa múmkindik bermeıdi. Osyǵan baılanysty qujatta ıslamdyq qarjylandyrýdyń negizgi qaǵıdattaryn zań deńgeıinde bekitý jáne ıslamdyq saqtandyrýdy yntalandyrý usynylady.

Zań jobasyn ekinshi oqylymda talqylaý barysynda senatorlar Májilis maquldaǵan qujatqa birqatar túzetýler engizgen. Atap aıtqanda, senatorlar saqtandyrý syıaqylaryn aıqyndaý boıynsha máselelerdi retteý bóliginde, sonymen birge, saqtandyrý syıaqysynyń eń tómengi mólsherin aıqyndaýǵa qatysty túzetýler usynyp otyr. Budan bólek, densaýlyqqa zalal keltirý nátıjesinde bolatyn qosymsha shyǵystardy óteý boıynsha saqtandyrý tólemderin júzege asyrýǵa qatysty máseleler de týyndaǵan.

Osy túzetýlerdiń barlyǵyna májilis kelisim berip, qujatty qabyldaý týraly sheshim shyǵardy. Endi Parlament qabyldaǵan zań Memleket basshysynyń qol qoıýyna joldanady.