Májilis «Іshki ister organdary týraly» zań jobasyna Senat engizgen túzetýlerimen kelisti
ASTANA. QazAqparat - Búgin Parlament Májilisiniń jalpy otyrysynda palata depýtattary «Іshki ister organdary týraly» zań jobasyna Senat depýtattary engizgen túzetýlerdi talqylap, oǵan kelisim berdi.
Eske sala keteıik, qujattyń maqsaty ishki ister organdary júıesin, quqyqtary men mindetterin aıqyndaý, ishki ister organdary qyzmetkerlerine quqyqtyq kepildikterdi qamtamasyz etý bolyp tabylady. Budan bólek, qujatta Іshki ister mınıstrliginiń quzyretterin ortalyq apparat jáne jalpy ishki ister organdary retinde bólý, zańdylyqty nyǵaıtýdyń quqyqtyq kepildikterin qamtamasyz etý men polıtsııany oǵan tán emes fýnktsııalardan aryltý kózdeledi. Budan bólek, zań jobasynyń basty baǵyttarynyń biri qoǵamdyq baqylaýdy azamattardyń quqyǵy men bostandyǵyn qorǵaýmen aınalysatyn ishki ister organdarynyń qyzmetine berý bolyp tabylady. Osyǵan oraı Іshki ister mınıstrliginiń janynan da, óńirlik ishki ister departamentteriniń janynan da qoǵamdyq keńester qurylatyn bolady. Zań jobasyndaǵy jańalyqtyń biri - ishki ister organdarynyń jumysyndaǵy arnaýly qaǵıdattardy qamtamasyz etý. Bular - adamnyń jáne azamattyń quqyǵyn saqtaý jáne syılaý, ashyqtyq, jarııalylyq, azamattyq qoǵam ınstıtýttarymen, buqaralyq aqparat quraldarymen jáne ishki ister organdarynyń biregeı júıesinde ózara is-qımylda bolý. Sonymen qatar, qujatta ishki ister organdary qyzmetkerlerine azamattardy kýálik etýge májbúrleýge, kúsh qoldanýǵa jáne quqyqqa qaıshy áreketterge tikeleı tyıym salatyn norma qamtylyp otyr. Senatorlar zań jobasyna eki túzetý engizgen bolatyn. Májilis osy túzetýlerge kelisimin berdi.
