Májilis Іshki ister organdary týraly zań jobasyn birinshi oqylymda maquldady

Jańa redaktsııadaǵy zań jobasy 9 bólimnen turady. Onyń mazmunyna keler bolsaq, qujattyń basty baǵyttarynyń biri qoǵamdyq baqylaýdy azamattardyń quqy men bostandyǵyn qorǵaýmen aınalysatyn ishki ister organdarynyń qyzmetine berý bolyp tabylady. «Bul - zań jobasynyń basty novellasy, oǵan oraı Іshki ister mınıstrliginiń janynan da, óńirlik ishki ister departamentteriniń janynan da qoǵamdyq keńester qurylatyn bolady. Zań jobasynyń jáne bir parasy ishki ister organdarynyń jumysyndaǵy arnaýly qaǵıdattardy qamtamasyz etedi. Bular - adamnyń jáne azamattyń quqyǵyn saqtaý jáne syılaý, ashyqtyq, jarııalylyq, azamattyq qoǵam ınstıtýttarymen, buqaralyq aqparat quraldarymen jáne ishki ister organdarynyń biregeı júıesinde ózara is-qımylda bolý», - dedi zań jobasy boıynsha baıandaǵan Іshki ister mınıstri Qalmuhanbet Qasymov.

Onyń aıtýyna qaraǵanda, zań jobasymen ishki ister organdary qyzmetkerlerine azamattardy kýálik etýge májbúrleýge, kúsh qoldanýǵa jáne quqyqqa qaıshy áreketterge tikeleı tyıym salatyn norma qamtylyp otyr.

Sonymen qatar, zań jobasymen qoǵamnyń keńinen talqysyna ushyraǵan polıtseılerdiń atys qarýyn qoldanýǵa qatysty máselesi de qarastyrylyp otyr. Osyǵan baılanysty mınıstrdiń aıtýynsha, qoldanystaǵy zańnamada polıtseıler tarapynyń qarý qoldaný tártipteri aıqyndalǵan, alaıda onda negizgi másele tek polıtsııa qyzmetkerleriniń quqyqtary jaıynda bolyp otyr. «Al jańa redaktsııada qarý qoldaný múmkindigi týraly eskertýdiń mindettemeleri jazylǵan. Soǵan oraı, zań jobasynyń normalary qarý qoldanýǵa bolarlyq negizderdi keńeıtpeıdi, kerisinshe, qyzmetkerlerdiń ony qoldanbas buryn eskertýin mindetteıdi», - deıdi Q. Qasymov.