Májilis ınklıýzıvti bilim berýdi sapaly iske asyrýǵa arnalǵan qujatty maquldady
NUR-SULTAN. QazAqparat – Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine ınklıýzıvti bilim berý máseleleri boıynsha ózgerister men tolyqtyrýlar engizý týraly» zań jobasy maquldandy, dep habarlaıdy QazAqparat tilshisi.
Zań jobasyna Qazaqstan Respýblıkasy Parlamenti Májilisi men Senaty depýtatattary, «Nur Otan» partııasynyń músheleri bastamashylyq etti.
«Atalǵan zań jobasy múgedek adamdardyń kemsitýsiz bilim alý quqyqtaryn qamtamasyz etý úshin Memleket basshysynyń 2019 jylǵy Qazaqstan halqyna Joldaýyn iske asyrý maqsatynda ázirlendi. Sondaı-aq qoldanystaǵy zańnamany 2015 jyly Qazaqstanda ratıfıkatsııalanǵan Múgedekterdiń quqyqtary týraly Konventsııaǵa sáıkes keltirýge baǵyttalǵan. Inklıýzıvti bilim berýge ótý adam quqyqtary týraly halyqaralyq hattamalarǵa jáne barlyq balalardyń sapaly bilim alýy men oǵan teń qoljetimdi quqyǵynyń bolýy jáne jalpyǵa birdeı tanýmen negizdelgen», - dedi Májilis depýtaty Janat Omarbekova
Onyń aıtýynsha, elimizde erekshe bilim berýdi qajet etetin 162 myńnan astam bala nemese balalardyń jalpy sanynyń 2,7 paıyzy bilim berý protsesine erekshe kózqarasty talap etedi. Osyǵan baılanysty 2011 jyldan bastap Qazaqstanda ınklıýzıvti bilim berýdi kezeń-kezeńmen damytý bastaldy. Qazaqstan Respýblıkasynda bilim berýdi damytýdyń 2011 - 2025 jyldarǵa arnalǵan memlekettik baǵdarlamasynda ınklıýzıvti orta qurý boıynsha sharalar kózdelgen.
«Sonymen birge, zańnamalyq deńgeıde retteýdi talap etetin máseleler de bar, olar bastamashylyq etken zań jobasynda kórinis tapty. Zań jobasynda «Bilim týraly», «Kemtar balalardy áleýmettik jáne medıtsınalyq-pedagogıkalyq túzeý arqyly qoldaý týraly», «Qazaqstan Respýblıkasyndaǵy balanyń quqyqtary týraly», «Qazaqstan Respýblıkasynda múgedekterdi áleýmettik qorǵaý týraly» zańdarǵa ózgerister men tolyqtyrýlar engizý kózdeledi. Birinshiden, bilim berýdiń barlyq deńgeılerinde oqytý úshin arnaıy jaǵdaılar jasaý esebinen erekshe bilim berýdi qajet etetin balalar úshin memlekettik kepildikter kózdelgen», - dedi J. Omarbekova.
Ekinshiden, oqý protsesinde erekshe bilim berýdi qajet etetin balalardy psıhologııalyq-pedagogıkalyq qoldap otyrýdyń arnaıy sharttary reglamenttelgen. Úshinshiden, bilim berý qajettilikterin baǵalaý engizilýde. Ol úshin baǵalaý ólshemderin, qajettilikterdi aıqyndaý ádistemesin, sondaı-aq «erekshe» balalarmen jumys jasaý boıynsha pedagogterge ádistemelik usynymdardy aıqyndaıtyn tıisti qaǵıdalar ázirlenetin bolady.
«Tórtinshiden, oqý josparlarynyń, baǵdarlamalar ózgermeligin, ıkemdiligin qamtamasyz etetin normalar, sondaı-aq bilim alýshynyń damý erekshelikterine baılanysty jetistikterin baǵalaý júıesi engizilgen. Bul ınklıýzıvti bilim berý protsesiniń jetekshi qaǵıdattarynyń biri bolyp tabylady. Besinshiden, bilim berý uıymdarynda arnaıy jaǵdaılardy qamtamasyz etýde, onyń ishinde erekshe bilim berýdi qajet etetin balalardy arnaıy psıhologııalyq-pedagogıkalyq qoldap otyrýǵa memlekettik bilim berý tapsyrysyn ornalastyrý esebinen ákimdikterdiń quzyreti keńeıtildi. Jan basyna shaqqandaǵy qarjylandyrýdy engizý bilim berý uıymy qyzmetiniń túri men nysanyna qaramastan qarjylandyrýdyń biryńǵaı tásilin qamtamasyz etedi. Memlekettik tapsyrysty iske asyrý jeke sektordy tartý, balalardy qamtý kórsetkishterin jaqsartý, sondaı-aq bıýdjetke júktemeni azaıtýǵa múmkindik beredi», - dedi depýtat.
