Májilis ındýstrııalyq-ınnovatsııalyq saıasatty jetildirýge baǵyttalǵan zań jobasyn maquldady
ASTANA. QazAqparat - Búgin Májiliste «Qazaqstan Respýblıkasynyń keıbir zańnamalyq aktilerine ındýstrııalyq-ınnovatsııalyq saıasat máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy. Qujat Elbasynyń «100 naqty qadam» Ult josparyndaǵy 55, 56, 57,59, 63 jáne 86 qadamdaryn iske asyrýǵa baǵyttalǵan.
Bul rette zań jobasynyń basty maqsaty asa qolaıly ınvestıtsııalyq klımat qalyptastyrý úshin ınvestıtsııalar salasyndaǵy, Qazaqstandaǵy týrızm ındýstrııasyn odan ári júıeli túrde damytý úshin týrıstik saladaǵy, ǵylymdy qajet etetin ekonomıkany qalyptastyrý maqsatynda ınnovatsııalyq klaster salasyndaǵy zańnamalardy odan ári jetildirý kózdeledi.
Máselen, ınnovatsııalyq klaster salasynda ǵylymdy qajet etetin ekonomıkany qalyptastyrý úshin eki ınnovatsııalyq klaster júzege asady. «Onyń biri, Astanada Nazarbaev Ýnıversıteti bazasynda qurylady. Onda ǵylymı zertteýler jasaý jáne ony sońynan kommertsııalandyrý úshin ǵylymı ortalyqtar, zerthanalar ornalasady. Ekinshisi, Almaty qalasynda óńirdegi joǵary oqý oryndary men ulttyq ortalyqtardyń ǵylymı-shyǵarmashylyq áleýetti paıdalaný úshin qurylady. Almatydaǵy ınnovatsııalyq klaster aldyna iri sheteldik joǵary tehnologııalyq kompanııalar men jergilikti kompanııalardy tarta otyryp, jobalardy júzege asyrý mindeti qoıylǵan. Bul úshin ınnovatsııalyq tehnologııalar parkine birlesken kásiporyndar qurý úshin basqarýshy organnyń ókilettigin keńeıtý usynylady», - dedi Investıtsııalar jáne damý mınıstri Áset Isekeshev. Budan bólek, zań jobasy energııa tıimdiligin arttyrý maqsatynda birqatar sharalardy qarastyrady. Atap aıtqanda, osy salaǵa jeke ınvestıtsııalardy tartý maqsatynda birqatar zańnamalyq kedergilerdi alyp tastaý kózdelgen.
