Májilis «Halyqtyń kóshi-qony týraly» zań jobasyn maquldady
ANA. 25 mamyr. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda palata depýtattary «Halyqtyń kóshi-qony týraly» zań jobasyn ekinshi oqylymda maquldady.
Atalǵan zań jobasynyń normalary elimizdiń ulttyq sáıkestigi men qaýipsizdigin saqtaý jáne damytý sheńberinde zańsyz kóshi-qondy barynsha qysqartý, saralanǵan kóshi-qondy qalyptastyrý jolymen kóshi-qon úderisteriniń keleńsiz saldaryn azaıtýǵa baǵyttalyp otyr. Qujatty ázirleýdegi maqsat ishki jáne syrtqy kóshi-qon aǵyndaryn memlekettik retteý salasyndaǵy zańnamalyq bazany odan ári jetildirý bolyp tabylady. Budan bólek, zań jobasy elimizge turaqty turý maqsatynda kelgen etnıkalyq qazaqtar men olardyń otbasy múshelerin, shetelden qaıtyp oralǵan otandastarymyz ben olardyń otbasy múshelerin, sondaı-aq elimizdiń ekonomıkalyq turǵydan perspektıvasyz jáne ekologııalyq jaǵynan qolaısyz aýmaqtarda turatyn Qazaqstan azamattaryn ońtaıly qonystandyrý bolyp tabylady. Bundaı ońtaıly qonystandyrý barysynda olardy ornalastyrýǵa járdem kórsetý men áleýmettik qoldaý jasaý kózdeledi.
Esterińizge sala keteıik, qoldanystaǵy zańnama 1997 jyly qabyldanǵan bolatyn. Jańa zań jobasynda alǵash ret kóshi-qon aǵymdarynyń negizgi túrleri kórsetilip, osyǵan qatysty olardyń ártúrli erekshelikterin eskere kele, retteý tetikteri de belgilenedi.
Budan bólek, zań jobasynda kóshi-qon máseleleri jónindegi tıisti ýákiletti organdardyń ózara is-qımyl jasaý tetigin belgileý, kóship-qonýshylar sanattaryn, sondaı-aq olardy memlekettik retteýdiń parametrlerin aıqyndaý sharalary kózdeledi.
Jobamen jumys isteý barysynda depýtattar qujattyń qurylymyn jaqsartatyn usynystar jasaǵan. Máselen, qujattyń uǵymdyq apparatynda «qonys aýdarýshy», «oralman», «ishki kóship-qonýshy», «etnıkalyq qazaq» degen termınderge jańa anyqtamalar berilgen.
Aıta keteıik, búgin Astanada bastalǵan Dúnıejúzi qazaqtarynyń IV Quryltaıynda sóılegen sózinde QR Prezıdenti - Dúnıejúzi qazaqtary qaýymdastyǵy Tóralqasynyń tóraǵasy Nursultan Nazarbaev Parlamentte talqylanyp jatqan "Halyqtyń kóshi-qony týraly" jańa zań jobasy sheteldegi qandastarymyzdyń elge kóship kelý jaǵdaıyn jaqsartýǵa septigin tıgizýi tıistigin qadap aıtty.
«Parlamentte "Halyqtyń kóshi-qony týraly" zań jobasy qaralýda. Keńinen talqylanyp, qabyldanatyn jańa zań qandastarymyzdyń jaǵdaıyn jaqsartýǵa septigin tıgizedi dep esepteımin. Ol sheteldegi otandastarymyzdyń qujat tapsyrýda tirkeýge turýǵa jáne azamattyq alýynda kezdesetin túrli kedergilerdi joıýy tıis. Bul oraıda bir nárseni qaperde ustaý kerek. Sońǵy kezderi belgilengen kvota tolmaı otyr. Týǵan elge taban tireımin, kóship kelemin deýshilerge esigimiz ashyq»,-dedi N. Nazarbaev.
Bul rette Prezıdent qandastardy Otanǵa oraltý jumysyn júıelendire túsý kerektigine de nazar aýdardy. Elbasy shetelden óz betinshe kóship kelemin deýshilerge, ásirese, jastarǵa esh kedergi bolmaýy tıistigin atap ótti.
