Májilis «Halyqtyń kóshi-qony týraly» zań jobasyn birinshi oqylymda maquldady

Atalǵan zań jobasynyń normalary elimizdiń ulttyq sáıkestigi men qaýipsizdigin saqtaý jáne damytý sheńberinde zańsyz kóshi-qondy barynsha qysqartý, saralanǵan kóshi-qondy qalyptastyrý jolymen kóshi-qon úderisteriniń keleńsiz saldaryn azaıtýǵa baǵyttalyp otyr. Qujatty ázirleýdegi maqsat ishki jáne syrtqy kóshi-qon aǵyndaryn memlekettik retteý salasyndaǵy zańnamalyq bazany odan ári jetildirý bolyp tabylady. Budan bólek, zań jobasy elimizge turaqty turý maqsatynda kelgen etnıkalyq qazaqtar men olardyń otbasy múshelerin, shetelden qaıtyp oralǵan otandastarymyz ben olardyń otbasy múshelerin, sondaı-aq elimizdiń ekonomıkalyq turǵydan perspektıvasyz jáne ekologııalyq jaǵynan qolaısyz aýmaqtarda turatyn Qazaqstan azamattaryn ońtaıly qonystandyrý bolyp tabylady. Bundaı ońtaıly qonystandyrý barysynda olardy ornalastyrýǵa járdem kórsetý men áleýmettik qoldaý jasaý kózdeledi. «Qoldanystaǵy zańnama 1997 jyly qabyldanǵan jáne ol elimizdiń sol kezdegi áleýmettik-ekonomıkalyq damý deńgeıine jáne halyqtyń kóshi-qony boıynsha júrgizilgen saıasatqa tolyǵymen sáıkes keldi. Alaıda, ony qabyldaǵan ýaqyttan bergi jyldar ishinde ekonomıka qurylymy túbegeıli ózgerdi. Osyǵan baılanysty kóshi-qon aǵymy men sapasy da ózgeriske túsip otyr», - deıdi zań jobasy boıynsha baıandaǵan Eńbek jáne halyqty áleýmettik qorǵaý mınıstri Gúlshara Ábdiqalyqova. Onyń aıtýynsha, zań jobasynda alǵash ret kóshi-qon aǵymdarynyń negizgi túrleri kórsetilip, osyǵan qatysty olardyń ártúrli erekshelikterin eskere kele, retteý tetikteri de belgilenedi.

Budan bólek, zań jobasynda kóshi-qon máseleleri jónindegi tıisti ýákiletti organdardyń ózara is-qımyl jasaý tetigin belgileý, kóship-qonýshylar sanattaryn, sondaı-aq olardy memlekettik retteýdiń parametrlerin aıqyndaý sharalary kózdeledi. «Zań jobasynda kóshi-qonnyń birqatar negizgi túrleri kórsetiledi. Atap aıtqanda, olar - tarıhı otanyna oralý maqsatyndaǵy kóshi-qon, otbasymen qosylý maqsatyndaǵy kóshi-qon, bilim alý maqsatyndaǵy, eńbek qyzmetin júzege asyrý maqsatyndaǵy, sondaı-aq gýmanıtarlyq, saıası sebepter boıynsha kóshi-qon», - deıdi mınıstr G. Ábdiqalyqova.

Jobamen jumys isteý barysynda depýtattar qujattyń qurylymyn jaqsartatyn usynystar jasaǵan. Máselen, qujattyń uǵymdyq apparatynda «qonys aýdarýshy», «oralman». «ishki kóship-qonýshy», «etnıkalyq qazaq» degen termınderge jańa anyqtamalar berilgen.

Birinshi oqylymda maquldanǵan zań jobasy ekinshi oqylymǵa ázirleý úshin Bas komıtetke tapsyrylady.