Májilis halyqaralyq poshta tranzıtine qatysty qujatty maquldady
Qazaqstan Respýblıkasy 1992 jyldan bastap Dúnıejúzilik poshta odaǵynyń tolyq múshesi bolyp sanalady. Atalǵan odaqtyń basty mindetteri - osy saladaǵy halyqaralyq yntymaqtastyqty damytý máselesin kótermeleý, sonymen qatar, damýshy elderge poshta qyzmetin uıymdastyrý jáne tehnıkalyq kómek kórsetýdi qamtamasyz etý.
«Dúnıejúzilik poshta odaǵyna múshe bolý - onyń Jarǵysy, Konventsııasy, Reglamenti jáne qosymsha Kelisimderi sııaqty negizgi qujattaryna qol qoıý arqyly rastalady. Qaraýǵa usynylyp otyrǵan Dúnıejúzilik poshta odaǵy Jarǵysynyń toǵyzynshy hattamasy Dúnıejúzilik poshta odaǵynyń 26 Kongresinde jasalǵan jáne Qazaqstan Respýblıkasy ýákiletti ókilderimen qol qoıylǵan. Osy hattamamen Dúnıejúzilik poshta odaǵy Jarǵysyna poshta aýmaǵynda barlyq joldamalardyń ózara almasýyn jeńildetýge arnalǵan normalar, Konventsııa jáne Reglamenttegi normalarmen sáıkestendirý, sondaı-aq qaıtalanatyn sıpattaǵy normalardy alyp tastaý qarastyrylǵan», - dedi Tsıfrlyq damý, ınnovatsııalar jáne aeroǵarysh mınıstri Asqar Jumaǵalıev.
Osy zań jobasyn qabyldaý halyqaralyq mindettemelerge sáıkes kelýge múmkindik beredi jáne qarjylyq, quqyqtyq, ekologııalyq ári áleýmettik-ekonomıkalyq saldarǵa ákelip soqpaıdy, poshta baılanysy salasyndaǵy halyqaralyq yntymaqtastyqty qoldaý úshin qolaıly jaǵdaılar jasaıdy.