Májilis «Ǵylym týraly» zań jobasyn birinshi oqylymda maquldady

Atalǵan zań jobasy Memleket basshysynyń Parlamenttiń sessııasyn ashý barysynda júktegen tapsyrmasyn, sondaı-aq 2009 jylǵy qyrkúıekte ǵylym jónindegi keńeste alǵan qoıǵan mindetterdi sheshý maqsatynda ázirlengen bolatyn. Jobany ázirleýshilerdiń aıtýynsha, qujat qoǵam talabyna jaýap beretin, elimizdiń básekege qabilettiligin arttyrýǵa baǵyttalǵan jańa ulttyq ǵylym júıesin qurýdyń quqyqtyq negizin aıqyndaıdy.

«Zań jobasy Elbasy júktegen saıası baǵdardy iske asyrýǵa baǵyttalyp, halyqaralyq tájirıbelerge súıene otyryp, ǵylymı qoǵamdastyqtyń ótinishi men tilekterin eskere otyryp ázirlendi. Qujat negizinde ǵylymdy basqarýdyń múldem jańa modeli usynylady. Bul basty eki quramdas bólikten turady. Birinshiden, sheshim qabyldaýdyń barlyq kezeńindegi ǵalymdar róli aıryqsha kóteriledi. Elbasy otandyq ǵylymdy basqarýdyń jańa júıesin qurý qajettigin aıtqan bolatyn. Jańa júıe ǵylym júıesiniń barlyq qatysýshylarynyń fýnktsııalaryn ońtaılandyrady jáne artyq bıýrokratııalyq basqarýǵa jol bermeıdi», - dedi zań jobasy boıynsha baıandaǵan Bilim jáne ǵylym mınıstri Baqytjan Jumaǵulov.

Onyń aıtýynsha, zań jobasy ǵylymdy basqarý júıesindegi strategııalyq, ákimshilik jáne saraptamalyq fýnktsııalardy naqtylaýdy qarastyrady. Bul úshin joǵary ǵylymı tehnıkalyq komıssııanyń fýnktsııalary keńeıtilip, Ulttyq ǵylymı keńesterge jiti nazar aýdarylady. Bular jetekshi qazaqstandyq jáne sheteldik ǵalymdardan qurylyp, jobalar men baǵdarlamalardyń oryndalýy týraly túpkilikti sheshim qabyldaıtyn bolady.

«Osylaısha, ǵylymı qaýymdastyqtyń sheshim qabyldaýdaǵy róli artyp otyr. Budan bólek, memlekettik ǵylymı-tehnıkalyq saraptamanyń ulttyq ortalyǵy qurylady. Ortalyq jobalar men baǵdarlamalardy táýelsiz, kásibı baǵalaýdy qamtamasyz etedi», - dedi mınıstr.

Birinshi oqylymda maquldanǵan zań jobasy ekinshi oqylymǵa ázirleý úshin bas komıtetke tapsyryldy.