Májilis gaz jáne gazben jabdyqtaý týraly zań jobasyn maquldady

Endi qujat Parlament Senatyna jiberiledi.

Atalǵan zań jobasy elimizdiń energetıkalyq jáne ekologııalyq qaýipsizdigin qamtamasyz etý, tutynýshylardyń barynsha keń aýqymyn irkilissiz gazben jabdyqtaýdy qamtamasyz etýge jaǵdaı jasaý maqsatynda ázirlengen. Bunymen qosa, zań jobasymen respýblıkanyń otyn-energetıkalyq balansynda gaz úlesin arttyrý jáne ásirese, óndiriletin ilespe gazdy el muqtajdyqtaryna tıimdi paıdalaný sharalary qarastyrylady.

«Zań jobasy Úkimet aıqyndaıtyn ulttyq operatordyń qyzmeti úshin zańnamalyq bazaǵa aınalady. Onyń negizgi mindetteriniń biri respýblıkanyń ishki qajettilikterin qamtamasyz etý basymdyǵy maqsatynda memlekettiń taýarly jáne shıkizatty gazdy satyp alýdyń basym quqyǵyn iske asyrý kózdeledi. Budan bólek, gazdandyrýdyń bas shemasyn ázirleý men bekitý josparlanyp otyr. Onyń máni boıynsha jumys istep turǵan gazben jabdyqtaý nysandaryn jańǵyrtý men jańalaryn salýdyń jospary jasalady. Gazdandyrýdyń bas shemasyn iske asyrý gazdyń ishki resýrstarynyń esebinen eldi gazdandyrý jónindegi strategııalyq mindetti sheshýge múmkindik beredi», - deıdi Munaı jáne gaz mınıstri Saýat Myńbaev. Onyń aıtýynsha, zań jobasy boıynsha gazdyń ishki naryǵyndaǵy baǵany memlekettik retteý tártibi bekitiledi. Bul rette taýarlyq jáne suıytylǵan gaz úshin Úkimet bekitetin shekti kóterme saýda baǵasyn engizý kózdelgen.

«Budan bólek, búgingi tańda suıytylǵan gaz naryǵynyń rettelmeı otyrǵany qupııa emes. Osyǵan oraı, depýtattardyń usynysymen suıytylǵan gazǵa degen ishki qajettilikterdi qanaǵattandyrý maqsatynda zań jobasynda óńirlerdiń málim bolǵan qajettilikterin eskere otyryp, ishki naryqqa suıytylǵan kómirsýtek gazyn jetkizýdiń josparyn bekitý kózdeledi. Sonymen qatar, tıisti materıaldyq-tehnıkalyq bazasy joq birkúndik fırmalardy gaz naryǵynan shyǵarý maqsatynda gaz jelisi uıymdaryn akkredıtteý tártibi qarastyrylady», - deıdi mınıstr.