Májilis feldegerlik baılanys týraly zań jobasyn maquldady
NUR-SULTAN. QazAqparat – Parlament Májilisiniń jalpy otyrysynda «Memlekettik feldegerlik baılanys týraly» zań jobasy ekinshi oqylymda maquldandy, dep habarlaıdy QazAqparat tilshisi.
Zańynyń jobasyn Úkimet Qazaqstan Respýblıkasy Parlamentiniń Májilisine 2020 jylǵy 6 qańtarda engizdi. Qujat feldegerlik baılanys salasyndaǵy zańnamany odan ári jetildirý maqsatynda ázirlendi.
Bıyl 19 mamyrda atalǵan zań jobasy birinshi oqylymda maquldandy.
Feldegerlik qyzmetti uıymdastyratyn quzyrly organ – Premer-Mınıstrdiń keńsesi.
Bul qyzmettiń mindeti – Úkimettiń hat almasý jumysyn qamtamasyz etý, memlekettik organdardyń asa mańyzdy ári qupııa hattaryn tasý, arnaıy poshtalardy TMD-ǵa múshe elderge jetkizý.
«Zań jobasynyń negizgi erejelerine toqtalsaq, feldegerlik baılanystyń mindetteri men qaǵıdattaryn zańnamalyq bekitýge, memlekettik feldegerlik qyzmet (MFQ) qyzmetkerleriniń quqyqtary men mindetterin aıqyndaýǵa, MFQ qyzmetkerleriniń quqyqtyq jaǵdaıyn reglamentteýge, MFQ qyzmetkerleriniń áleýmettik kepildikterin belgileýge baǵyttaldy», - dedi depýtat Berik Dúısenbınov.
Zań jobasyn qabyldaý qyzmettiń quqyqtyq, uıymdyq negizderin jáne MFQ qyzmetkerleriniń memlekettik organdarmen jedel ózara is-qımyl jasaý tártibin aıqyndaıdy.
Zań jobasymen jumys barysynda depýtattar zań jobasyn «Quqyqtyq aktiler týraly», «Tótenshe jaǵdaı týraly», «Іshki ister organdary týraly», «Saýda maqsatynda teńizde júzý týraly» zańdarǵa sáıkes keltirýge baǵyttalǵan túzetýler engizdi.
Sonymen qatar, búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine memlekettik feldegerlik baılanys jáne ishki ister organdary qyzmetiniń máseleleri boıynsha ózgerister men tolyqtyrýlar engizý týraly» ilespe zań jobasy da ekinshi oqylymda maquldandy.
