Májilis Eýrazııalyq ekonomıkalyq odaqtyń sharttaryn qaraıdy - Nurlan Nyǵmatýlın

NUR-SULTAN. QazAqparat – Búgin Májilis Spıkeri Nurlan Nyǵmatýlınniń tóraǵalyǵymen Palata Bıýrosy ótip, onda aldaǵy jalpy otyrystyń kún tártibi naqtylandy. Bul týraly QazAqparat Májilistiń baspasóz qyzmetine silteme jasap habarlaıdy.

Bıýro otyrysynda depýtattar qaraýyna Eýrazııalyq ekonomıkalyq odaqtyń taýar jáne qyzmet kórsetý belgileri jáne taýarlar shyǵarylǵan jerlerdiń ataýlary týraly shartty ratıfıkatsııalaý týraly zań jobasy usynyldy.

Sharttyń maqsaty taýar jáne qyzmet kórsetý belgilerine, taýar shyǵarylatyn jerlerdiń ataýlaryna qatysty quqyqtardy alýdyń óńirlik júıesin qurý.

Sonymen qatar, kún tártibiniń jobasynda Eýrazııalyq ekonomıkalyq odaqqa múshe memleketterdiń temeki ónimderine aktsızder salasyndaǵy salyq saıasatyn júrgizý qaǵıdattary týraly kelisimdi ratıfıkatsııalaý týraly zań jobasy bar.

Bul qujat temeki ónimderine aktsızderdi kezeń-kezeńmen úılestirýdi kózdeıdi.

Sondaı-aq, aldaǵy jalpy otyrysta depýtattar mıkroqarjylyq jáne kollektorlyq qyzmetti retteý máseleleri boıynsha túzetýlerdi ekinshi oqylymda qaraıtyn bolady.