Májilis Eýrazııalyq ekonomıkalyq odaq shartyna ózgerister engizý týraly hattamany maquldady
QR Qarjy mınıstri Erulan Jamaýbaevtyń aıtýynsha, atalǵan hattamaǵa 2019 jyly 1 qazanda Erevan qalasynda memleket basshylary qol qoıǵan. Shart 2015 jylǵy 1 qańtardan bastap kúshine endi, al Eýrazııalyq ekonomıkalyq odaqtyń Keden kodeksi eki jyldan keıin, ıaǵnı 2017 jyly qabyldandy.
«Keden kodeksiniń normalaryna sáıkes avanstyq tólemder ınstıtýtyn engizý kózdelgen. Osyǵan baılanysty shartqa tıisti túzetýler engizý qajettiligi týyndap otyr. Aldaǵy tólenetin kedendik tólemder men salyqtar, ósimpuldar men paıyzdar esebine engizilgen aqsha avanstyq tólem dep tanylady. Qazirgi ýaqytta kedendik tazartý kezinde alty kedendik tólemder men salyqtardyń túri tólene alady», - dedi mınıstr Májilistiń jalpy otyrysynda.
E. Jamaýbaev osy hattamany ratıfıkatsııalaýdyń syrtqy ekonomıkalyq qyzmet qatysýshylaryna ýaqyt únemdep, shyǵyndaryn qysqartýǵa múmkindik beretinin aıtty.
«Atap aıtqanda:
birinshiden, kedendik deklaratsııalaý úshin kedendik alymdy, kedendik bajdy, qosylǵan qun salyǵyn, aktsızdi, arnaıy, dempıngke qarsy jáne ótemaqy bajyn tóleý úshin birneshe tólem tapsyrmalaryn paıdalaný qajettiligine baılanysty shyǵyndardy barynsha azaıtý;
ekinshiden, qolda bar avanstyq tólemderdi kedendik bajdardy tóleý jónindegi mindetterdi oryndaýdy qamtamasyz etý úshin paıdalaný;
úshinshiden, syrtqy ekonomıkalyq qyzmetke qatysýshylar osy tólemderdi paıda bolǵan bereshekti óteýge paıdalaný múmkindigine ıe bolady;
tórtinshiden, bıýdjettik synyptama kodynyń árbir túri boıynsha aqsha qarajatynyń qaldyqtaryn jeke-jeke qadaǵalaý qajettiligi joq», - dep túsindirdi ol.
Keden organy avanstyq tólemderdi engizgen tulǵanyń ótinishi boıynsha oǵan avanstyq tólemder retinde engizilgen qarajattyń jumsalýy týraly esep beredi.
«Atalǵan hattamany ratıfıkatsııalaý bizdiń elimiz úshin áleýmettik-ekonomıkalyq jáne quqyqtyq saldarǵa ákep soqtyrmaıdy jáne respýblıkalyq bıýdjetten qarajat bólýdi talap etpeıdi. Sizderden osy Hattamany ratıfıkatsııalaý boıynsha oń sheshim qabyldaýlaryńyzdy suraımyz», - dedi Qarjy mınıstri.
