Májilis Eýrazııalyq ekonomıkalyq komıssııanyń básekelestik qaǵıdalaryna qatysty qujatty maquldady

NUR-SULTAN. QazAqparat – Parlament Májilisiniń jalpy otyrysynda «2014 jylǵy 12 qarashadaǵy Eýrazııalyq ekonomıkalyq komıssııanyń básekelestiktiń biryńǵaı qaǵıdalarynyń saqtalýyn baqylaý jónindegi ókilettikterdi júzege asyrýy kezinde qupııa aqparatty qorǵaý tártibi jáne ony jarııa etkeni úshin jaýaptylyq týraly kelisimge ózgerister engizý týraly hattamany ratıfıkatsııalaý týraly» zań jobasy maquldandy, dep habarlaıdy QazAqparat tilshisi.

«Eýrazııalyq ekonomıkalyq odaqtyń turaqty jumys isteıtin retteýshi organy retinde Eýrazııalyq ekonomıkalyq komıssııa qurylǵan sátten bastap 10 jylǵa jýyq ýaqyt ótti. Osy kezeńde Eýrazııalyq ekonomıkalyq odaqqa múshe memleketter úshin monopolııaǵa qarsy zańnamany jetildirý bóliginde biryńǵaı saıasattyń jumys isteýi úshin qolaıly jaǵdaılar qamtamasyz etildi. Komıssııa transshekaralyq naryqtardaǵy básekelestiktiń jalpy qaǵıdalarynyń saqtalýyn baqylaý jónindegi óz ókilettikterin iske asyrý aıasynda ótinishterdi qaraý, tergep-tekserýler júrgizý men isterdi qaraý sııaqty qajetti aqparatty, onyń ishinde memlekettik bılik organdarynan, zańdy jáne jeke tulǵalardan qupııa aqparatty suratady ári alady. Osy Kelisim qupııa aqparatpen jumys isteý tártibin retteıdi jáne Komıssııa qyzmetkerleriniń qupııa aqparatty alǵan kezde ony jarııa etkeni úshin jaýapkershiligin reglamentteıdi», - dedi Básekelestikti qorǵaý jáne damytý agenttiginiń tóraǵasy Serik Jumanǵarın.

Kelisimge 2014 jylǵy 12 qarashada Qazaqstan Respýblıkasy Reseı Federatsııasymen jáne Belarýs Respýblıkasymen birlesip qol qoıdy. Qyrǵyz Respýblıkasy men Armenııa Respýblıkasy Kelisimge keıinirek qosyldy.

Agenttiń basshysynyń aıtýynsha, ratıfıkatsııalanatyn Hattama redaktsııalyq sıpattaǵy ózgerister engizý arqyly Kelisimniń mátinin EAEO týraly shartqa sáıkes keltirýge baǵyttalǵan. Osy oraıda «taraptar» degen sóz «múshe memleketter», «biryńǵaı» degen sóz «jalpy», «qyzmetkerler» degen sózder «laýazymdy adamdar men qyzmetkerler» degen sózdermen aýystyryldy.

«Osylaısha, Hattamany ratıfıkatsııalaý jáne qabyldaý Eýrazııalyq ekonomıkalyq komıssııanyń Eýrazııalyq ekonomıkalyq odaq týraly sharttyń erejelerine sáıkes básekelestiktiń jalpy qaǵıdalarynyń saqtalýyn baqylaý jónindegi ókilettikterin tolyq iske asyrýdy qamtamasyz etýine múmkindik beredi», - dedi S. Jumanǵarın.