Májilis eńbek kóshi-qony máselelerine arnalǵan zań jobasyna Senat engizgen usynystarmen kelisti
ASTANA. 27 qarasha. QazAqparat - Búgin Parlament Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine eńbek kóshi-qony máseleleri boıynsha ózgerister men tolyqtyrýlar engizý týraly» zań jobasyna Senat engizgen túzetýlerdi talqylady.
Eske salsaq, zań jobasy eńbekshi kóship kelýshilerdi zańdastyrýǵa jáne kóshi-qon úderisterin memlekettik retteýdi jetildirýge baǵyttalǵan. Qujattyń basty maqsaty eńbek ımmıgranttaryn zańdastyrý, kóshi-qon úderisindegi memlekettik retteý máselelerin jetildirý bolyp tabylady. Atap aıtqanda, jeke tulǵalarda jumys isteý úshin eńbek mıgranttaryna ruqsat berý tártibi aıqyndalady. Zań jobasymen eńbekshi kóship kelýshilerge jeke tabys salyǵyn aılyq eseptik kórsetkishtiń 2 eselengen mólsherinde tólem jasaýyn engizý máselesi qarastyrylady. Sondaı-aq, eger de eńbekshi kóship-qonýshy jeke tabys salyǵynyń somasy jeke tabys salyǵy somasynyń aldyn ala tóleminen asyp ketken jaǵdaıda salyq komıtetine jeke tabys salyǵy boıynsha deklaratsııa tapsyrýy qarastyrylǵan. Sonymen qatar, ýákiletti organ eńbekshi kóship-qonýshy retinde bekitken merzim men sıpaty boıynsha ruqsat berilgen salyq tóleýshiniń turaǵy týraly málimetterdi salyq qyzmetteri organdaryna berýge ishki ister organdary mindettelip otyr.
Túıindeı aıtsaq, qujatqa engizilgen ózgeristerdiń arqasynda elimizge kelip, zańsyz eńbek qyzmetin júzege asyratyn sheteldikter zańdastyrylady, olardyń elde bolýyn baqylaýdyń tıimdiligi artady. Sondaı-aq, kez kelgen qazaqstandyq jeke tulǵa úshin sheteldik jumys kúshin tartýǵa ruqsattar beriledi. Eńbek mıgranttaryna engiziletin salyqtyń arqasynda bıýdjetke túsetin túsim ulǵaıady.
Aıta keterlik taǵy bir másele zań jobasynda etnıkalyq qandastarymyzdyń Qazaqstan Respýblıkasynyń azamattyǵyn alý úshin elimizde mindetti túrde bes jyl turý merzimi belgilengen bolatyn. Qoǵamda túrli pikirler týdyrǵan osy merzimdi Senat tórt jylǵa deıin tómendetti.
Májilis Senat usynǵan túzetýlerge kelisimin berip, qujatty qabyldady.
