Májilis «elektrondyq úkimetti» damytýǵa arnalǵan zań jobasyn birinshi oqylymda maquldady
ASTANA. Sáýirdiń 21-i. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda palata depýtattary «QR keıbir zańnamalyq aktilerine QR «elektrondyq úkimetin» damytý máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady,
dep habarlaıdy QazAqparat.
Zań jobasynyń negizgi maqsaty aqparattyq júıelerdi qoldana otyryp, elektrondyq nysanda memlekettik qyzmetter kórsetýdi retteıtin quqyqtyq normalardy belgileý jolymen «elektrondyq úkimet» júıesin damytý máseleleri boıynsha olardyń ashyqtyǵyn qamtamasyz etýge baǵyttalady. Sonymen birge, qujatta ákimshilik rásimderdi ońtaılandyrý, elektrondyq memlekettik qyzmetter kórsetý máselelerinde memlekettik basqarý sapasy men tıimdiligin arttyrý sharalary qarastyrylady.
Zań jobasymen qoldanystaǵy Azamattyq is júrgizý kodeksine jáne 8 zańǵa ózgerister men tolyqtyrýlar engizý kózdelip otyr. Joba boıynsha baıandama jasaǵan Baılanys jáne aqparat mınıstri Asqar Jumaǵalıev qujatty ázirleý barysynda birqatar halyqaralyq tájirıbeler nazarǵa alynǵanyn atap ótti. Máselen, mınıstrdiń aıtýynsha, elektrondyq qyzmetter týraly zańdy álemde eń birinshi bolyp 2001 jyly Fınlıandııa qabyldaǵan. Budan keıingi jyldary AQSh pen Ońtústik Koreıa elderi de osyndaı zań qabyldaǵan.
«Zań jobasy boıynsha memlekettik elektrondyq qyzmetterdi ınteraktıvti rejimde berý úshin birqatar normalar engiziledi. Atap aıtqanda, elektrondyq qujattar túrinde talap-aryzdardy berý, memlekettik bazalardaǵy aqparatty azamattardan talap etpeý, memlekettik organdardyń elektrondyq qyzmetterdi engizý merzimderin bekitý, elektrondyq nysanda memlekettik organdarǵa qujattar usyný, elektrondyq nysanda memlekettik organdardan qujattar alý, elektrondyq nysanda lıtsenzııalaýdy reglamentteý sharalary kózdelip otyr. Ekinshi baǵyt boıynsha usynylatyn normalar tólem shlıýzi termınin jáne operatordyń fýnktsııalaryn engizýdi, tólem shlıýzi arqyly elektrondyq memlekettik qyzmetter úshin tólem jasaýdy qamtamasyz etedi. Sonymen, qatar qujat boıynsha azamattar men zańdy tulǵalarǵa «elektrondyq úkimettiń» tólem shlıýzi arqyly tólemder jasaýǵa múmkindik qarastyrylǵan», dedi mınıstr.
Birinshi oqylymda maquldaǵan zań jobasy ekinshi oqylymǵa ázirleý úshin Bas komıtetke tapsyrylady.
