Májilis elektr energetıkasy naryǵyn engizý merzimine qatysty Senattyń usynysyna kelisimin berdi
Eske salaıyq, qujat Memleket basshysynyń bes ınstıtýtsıonaldyq reformasy aıasyndaǵy «100 naqty qadam» Ult josparyn júzege asyrýǵa baǵyttalǵan zań jobasy elimizdegi elektr energetıkasy salasyn jetildirýge baǵyttalǵan bolatyn. Osyǵan oraı, zań jobasymen elimizde birtutas elektr energetıkalyq júıesiniń júkteme kóterýge ázirligin qoldaý úshin biryńǵaı satyp alýshy qurylatyny kózdeledi. Sonymen qatar, elektr energııasynyń ortalyqtandyrylǵan ımporty men eksportyn júzege asyrý úshin Ulttyq operator ınstıtýty engizilmek. Budan bólek, zań jobasynda salanyń ınvestıtsııalyq tartymdylyǵyn arttyrý maqsatynda elektr energetıkasy salasyndaǵy tarıf saıasatyn ózgertý usynylady. Sonymen qatar, elektr energııasy naryǵynyń aıqyndylyǵy men turaqty jumys isteýin qamtamasyz etý úshin Naryq keńesin qurý qarastyrylady. Tutastaı alǵanda, zań jobasy energııa óndirýshi uıymdar úshin ınvestıtsııalardy qaıtarýdyń uzaqmerzimdi kepildikterin qamtamasyz etýge jaǵdaılar jasamaq.
Al Senat tarapynan engizilgen ózgeristerge kelsek, onda negizinen elektr energetıkasy naryǵyn engizýdi 2019 jylǵa deıin shegerý týraly usynys engizilgen. Al zań jobasynda bul merzim 2016 jyldyń 1 qańtarynan enedi dep kórsetilgen bolatyn. «13 qazanda Senat pen Májilis Tóraǵalarynyń atyna Úkimet basshysy Kárim Másimovten hat kelip tústi. Onda Ulttyq komıssııanyń elektr qýaty naryǵyn engizý merzimin 2016 jyldyń 1 qańtarynan 2019 jyldyń 1 qańtaryna aýystyrý týraly ótinish jasalǵan bolatyn. 15 qazanda Senat osy usynysty eskerip, tórt túzetý engizdi. Bul túzetýler negizinen elektr energetıkasy naryǵyndaǵy modeldi ózgertpeıdi», - dedi Májilis depýtaty Shavhat Ótemisov.
Osyǵan oraı, depýtattar zańdy qabyldady. Endi qujat Memleket basshysynyń qol qoıýyna joldanady.