Májilis elektr energetıkasy máselelerine arnalǵan zań jobasyn talqylaıdy
ASTANA. 26 naýryz. QazAqparat - 28 naýryz, sársenbi kúni, Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine elektr energetıkasy, tabıǵı monopolııalar men retteletin naryq sýbektileriniń ınvestıtsııalyq qyzmeti
máseleleri boıynsha tolyqtyrýlar men ózgerister engizý týraly» zań jobasy birinshi oqylymda talqylanady. Bul týraly palatanyń baspasóz qyzmetinen habarlandy.
Atalǵan zań jobasy boıynsha depýtattar aldynda QR Ekonomıkalyq damý jáne saýda mınıstri Baqytjan Saǵyntaev baıandama jasaıdy.
Sonymen qatar, jalpy otyrysta QR Qorǵanys mınıstriniń orynbasary Talǵat Janjúmenov «Ujymdyq qaýipsizdik týraly shart uıymy sheńberinde áskerı maqsattaǵy ónimdi óndirýge qatysatyn kásiporyndar men uıymdardyń mamandanýyn saqtaý týraly kelisimdi ratıfıkatsııalaý týraly» Qazaqstan Respýblıkasy Zańynyń jobasy jóninde baıandama jasaıdy.
Osy máselelermen birge Úkimetten kelip túsken «Qazaqstan Respýblıkasy men Birikken Arab Ámirlikteri arasyndaǵy Qylmyskerlerdi ustap berý týraly kelisimdi ratıfıkatsııalaý týraly» zań jobasy boıynsha qorytyndy ázirleý máselesi qaralady. Zań jobasy Halyqaralyq ister, qorǵanys jáne qaýipsizdik komıtetine berilmek.
Sondaı-aq, Áleýmettik-mádenı damý komıtetiniń «Qazaqstan Respýblıkasynyń memlekettik rámizderi týraly» Qazaqstan Respýblıkasynyń Konstıtýtsııalyq zańyna ózgerister men tolyqtyrýlar engizý týraly» jáne «Qazaqstan Respýblıkasynyń keıbir zańnamalyq aktilerine memlekettik rámizder máseleleri boıynsha ózgerister men tolyqtyrýlar engizý týraly» eki zań jobasymen jumysty jalǵastyrý jónindegi usynystary qaralady.
