Májilis EAEO memleketteriniń kedendik ákelý bajdaryn bólý normatıvterin maquldady
NUR-SULTAN. QazAqparat – Parlament Májilisiniń jalpy otyrysynda «2014 jylǵy 29 mamyrdaǵy Eýrazııalyq ekonomıkalyq odaq týraly shartqa ózgerister engizý, sondaı-aq jekelegen halyqaralyq sharttardyń qoldanysyn ózgertý jáne toqtatý týraly hattamany ratıfıkatsııalaý týraly» zań jobasy maquldandy, dep habarlaıdy QazAqparat tilshisi.Hattama 2019 jyly 1 qazanda Erevanda jasaldy.
«Hattamada kedendik ákelý bajdarynyń somalaryn bólýdiń jańa normatıvterin bekitý kózdeledi. Normatıvterdiń mólsheri múshe bes memleket úshin aıqyndalǵan. Bul rette Qazaqstan úshin normatıv 6,955% bolyp otyr», - dedi Ulttyq ekonomıka mınıstri Rýslan Dálenov.
Atalǵan normatıvter Eýrazııalyq ekonomıkalyq odaqqa múshe memleketter arasynda kedendik ákelý bajdaryn bólýge mólsherles tásildi qamtamasyz etýge arnalǵan.
«Sondaı-aq, Hattamada múshe memleketterdiń joǵary memlekettik qarjylyq baqylaý organdary birlesken baqylaý is-sharalary aıasynda múshe memleketterdiń ýákiletti organdarynyń osy Hattamanyń erejelerin saqtaýyn jyl saıyn tekseretini aıqyndalǵan. «Halyqaralyq sharttar týraly» Zańǵa sáıkes osy Hattama ratıfıkatsııalaýǵa jatady. Zań jobasyn qabyldaý áleýmettik-ekonomıkalyq jáne quqyqtyq teris saldarǵa ákep soqtyrmaıdy», - dedi mınıstr.
