Májilis EAEO aýmaǵyndaǵy aqsha aınalymyna qatysty qujatty maquldady

ASTANA. QazAqparat – Májilis EAEO-nyń kedendik shekarasy arqyly qolma-qol aqsha qarajatyn ótkizý kezinde qylmystyq jolmen alynǵan kiristerdi zańdastyrýǵa qarsy is-qımyl jónindegi zań jobasyn maquldady, dep habarlaıdy QazAqparat tilshisi.

Qujattyń resmı ataýy — «EAEO-nyń kedendik shekarasy arqyly qolma-qol aqsha qarajatyn nemese aqsha quraldaryn ótkizý kezinde qylmystyq jolmen alynǵan kiristerdi zańdastyrýǵa jáne terrorızmdi qarjylandyrýǵa qarsy is-qımyl salasynda aqparat almasý týraly kelisimdi ratıfıkatsııalaý týraly» zań jobasy.

Atalǵan Kelisimge 2021 jylǵy 20 shildede Máskeý qalasynda qol qoıyldy.

«Osy Kelisimdi ázirleýdiń maqsaty - jeke tulǵalardyń qolma-qol aqsha qarajatyn Eýrazııalyq ekonomıkalyq odaǵynan shet elge ótkizý boıynsha aqparat almasý. Kelisimde kedendik Eýrazııalyq ekonomıkalyq odaq arqyly qolma-qol aqsha qarajatyn nemese aqsha quraldaryn ótkizý kezinde ózara is-qımyl jáne aqparat almasý tártibi aıqyndalǵan», - dedi QR Premer-Mınıstriniń orynbasary – Qarjy mınıstri Erulan Jamaýbaev.

Onyń aıtýynsha, aqparat boıynsha ózara is-qımyl EAEO-ǵa múshe bir memlekettiń ýákiletti, quqyq qorǵaý jáne keden organdarynyń ekinshi múshe memlekettiń jaýapty organyna suraý salýlary boıynsha júzege asyrylady.

«Aqparat almasý jolaýshylardyń kedendik deklaratsııasynda jáne taýarlar deklaratsııasynda jeke tulǵa málimdegen aqparatty usyný arqyly júzege asyrylady. Ózara is-qımyl jasaý tártibinde suraý salýdyń mazmuny, ony oryndaý merzimderi, oǵan qol qoıýǵa ýákiletti laýazymdy tulǵalar, sondaı-aq suraý salýdy oryndaýdan bas tartý múmkin jaǵdaılary eskeriledi. Kelisimde ózara is-qımyl jáne aqparat almasý aıasynda alynǵan aqparattyń qupııalylyǵy, ony qorǵaý, saqtaý jáne joıý týraly normalar qarastyrylǵan. Sonymen qatar, mundaı aqparat ruqsatsyz taratylǵan jaǵdaıda múshe memleketter qabyldaıtyn sharalar qamtylady», - dedi mınıstr.