Májilis Dúnıejúzilik bankpen yntymaqtastyq máselelerin talqylady
ASTANA. QazAqparat - Búgin Májilis tóraǵasynyń orynbasary Gúlmıra Isımbaeva Dúnıejúzilik bank tobynyń Aǵa vıtse-prezıdenti jáne banktiń bas konsýly Sendı Okoro men Dúnıejúzilik banktiń delegatsııasymen kezdesti, dep habarlaıdy QazAqparat Májilistiń baspasóz qyzmetine silteme jasap.
Shara barysynda vıtse-spıker Qazaqstan men Dúnıejúzilik bank arasyndaǵy baılanystyń joǵary deńgeıde ekendigine jáne kelesi jyly atalyp ótetin Dúnıejúzilik banktiń 75 jyldyq mereıtoıyna nazar aýdardy.
G. Isımbaeva Dúnıejúzilik banktiń 25 jyl ishinde Qazaqstanǵa qarjylyq jáne tehnıkalyq kómek kórsetýde, sondaı-aq, «Nurly jer» baǵdarlamasyn iske asyrýda mańyzdy ról atqarǵanyn atap ótti.
Osy rette, Dúnıejúzilik bank toby 2012-2017 jyldarǵa arnalǵan Qazaqstanmen seriktestik strategııasyn júzege asyrýǵa úlken qoldaý kórsetkenin aıta kerek. Dúnıejúzilik bank toby Qazaqstanmen áriptestigi sheńberinde bilim berý salasyndaǵy qol jetimdilik jáne kásibı daǵdylar, qorshaǵan ortany qorǵaý men saqtaý, aýyl sharýashylyǵy salasyn jańǵyrtý, sondaı-aq, qarjylyq saýattylyq pen basqa da salalardy qamtydy.
Vıtse-spıker Dúnıejúzilik bank toby Qazaqstan úshin óte baǵaly seriktes bolyp qala beretinin jetkizip, yntymaqtastyqty odan ári jalǵastyrýǵa nıetti ekenin aıtty.
Kezdesý barysynda «Astana» halyqaralyq qarjy ortalyǵynyń qurylýyna basa nazar aýdaryldy.
Sonymen qatar, G. Isımbaeva halyqaralyq ortalyqtyń Ortalyq Azııadaǵy qarjy habyna aınalyp, aımaqtarǵa ınvestıtsııalar tartýǵa yqpal etetine senim bildirdi.
Óz kezeginde Dúnıejúzilik bank tobynyń vıtse-prezıdenti Sendı Okoro Astananyń 20 jyldyq mereıtoıymen quttyqtap, Qazaqstan men Dúnıejúzilik bank tobynyń arasyndaǵy yntymaqtastyqty atap ótip, Qazaqstannyń senimdi áriptes memleket ekenine toqtaldy.
Kezdesýge Májilis depýtattarynan Gúljan Qaraqusova men Amanjan Jamalov qatysty.
