Májilis depýttary Kókshetaýdaǵy «KamAZ-Injınırıng» AQ eńbek ujymymen kezdesti
KÓKShETAÝ. QazAqparat - Kókshetaýǵa jumys saparymen kelgen QR Parlamenti Májilisiniń depýtattary Janat Omarbekova, Saparhan Omarov, Maıra Aısına, Murat Temirjanov, Sergeı Zvolskıı, Mıhaıl Chırkov jáne ıÝrıı Tımoşenko Kókshetaýdaǵy júk kólikterin shyǵaratyn «KamAZ-Injınırıng» aktsıonerlik qoǵamynda bolyp, eńbek ujymymen kezdesti, dep habarlaıdy «QazAqparat» HAA tilshisi.
Kókshetaý qalasyndaǵy irgeli kásiporyn osy kúni elimizdegi únemshildik óndiris júıesin qoldanyp otyrǵan sanaýly zaýyttardyń qatarynda. Bıyl óndiris oshaǵynyń qurylǵanyna 12 jyl tolady. Elimizdegi mashına jasaý ónerkásibi salasynda óziniń laıyqty ornyn alyp úlgergen zaýyt osy sanaýly ýaqyttyń ishinde otandyq mashına jasaý salasyn damytýǵa qomaqty úlesin qosyp kele jatqan kásiporyn. Búginde ujym jumysy aktsıonerlerdiń qoldaýy arqasynda ilgeri basýda. Kásiporyn qurylǵan 2005 jyldary júk kóliginiń úsh túrin shyǵarýdyń ózinde edáýir qıyndyqtar bolǵan edi. Keıin bári artta qaldy. Qazirgi kezde zaýyttan zaman talabyna saı «KamAZ» júk kólikteri men arnaıy tehnıkanyń 40-tan astam túri qurastyrylady. Zaýyt qurylǵannan beri barlyǵy 11 myńnan astam kólik konveıerden shyqty. Bul kólikterge búginde Qazaqstan Respýblıkasynyń Qarýly Kúshteri tarapynan suranys kúrt azaıyp ketkenine qaramastan, Tótenshe jaǵdaılar komıteti, jol qurylysy jáne aýyl sharýashylyǵy salasynda oıdaǵydaı qoldanylýda. Kásiporynnyń óndiristik qýaty jylyna 2 myńǵa jýyq avtokólik shyǵarýǵa erkin jetse, ótken jyly 800-den astam júk kóligi qurastyryldy. Bıyl bul kórsetkishti 1400-ge jetkizý kózdelgen. Ujymda 200-den astam adam eńbek etedi.
Májilis depýtattary zaýyttyń qurastyrý tsehyn aralap kórip, shyǵarylyp jatqan tehnıka túrlerimen tanysty.
«Sońǵy kezde kásiporyn basshylyǵy ónim óndirýde otandyq úlestiń mol bolýyna erekshe nazar aýdaryp keledi. Ony elimizdiń joldarynda júıtkip júrgen «Qazaqstanda jasalǵan» degen eksklıýzıvti arnaıy tehnıkalardan baıqaýǵa bolady. Degenmen, áli de otandyq úlesti artyrý jáne daıyn ónimdi satý shekarasyn keńeıtý baǵyttynda aýqymdy jumys isteý kerek. Biz óz tarapymyzdan kómektesýge daıynbyz», -dedi Májilis depýtaty Murat Temirjanov.
Kezdesý barysynda halyq qalaýlylaryna zaýyt ujymy tarapynan áleýmettik máseleler jóninde saýaldar qoıylyp, tushymdy jaýaptar alyndy. Sondaı-aq, zaýyt ujymyndaǵy eńbek ozattary Qazaqstan Respýblıkasy Parlamenti Májilisiniń Alǵys hatymen marapattaldy.
