Májilis depýtatynyń pikirinshe, mektep baǵdarlamasyna «Otbasylyq ómirdiń etıkasy jáne psıhologııasy» pánin qaıta engizý qajet
ASTANA. Qazannyń 4-i. QazAqparat /Rýslan Ǵabbasov/ - Májilis depýtaty Aıtkúl Samaqovanyń pikirinshe, elimizdegi mektep baǵdarlamasyna «Otbasylyq ómirdiń etıkasy jáne psıhologııasy» atty pándi qaıta engizý qajet. Bundaı pikirdi depýtat Astanada ótken «Qazaqstan qoǵamynyń damýy men ornaýyndaǵy otbasy tárbıesiniń róli» atty dóńgelek ústelde aıtty.
A. Samaqova 90-shy jyldary jalpy bilim berý mektepterinde «Otbasylyq ómirdiń etıkasy jáne psıhologııasy» atty pán engizilgenin aıta kele: «alaıda, kóp keshiktermeı bul pán mekteptiń oqý baǵdarlamasynan joǵalyp ketti. Menińshe, Bilim jáne ǵylym mınıstrligi osy pándi qaıta baǵdarlamaǵa qosýy kerek. Múmkin ony basqa ataýmen engizse de bolady. Degenmen de biz atalǵan pándi bilim berý standartyna qosýymyz shart. Múmkin ony balabaqshadan bastap oqytqan da durys bolar», dedi. Osy oraıda depýtat otbasy ómiri turǵysynda bul pán balalarǵa durys túsinik berýge aıtarlyqtaı kómek beretinin jetkizdi. «Bul pánde tek adamgershilik tárbıe qaǵıdalary qamtylǵan. Bala tárbıesi máselesine búginde basa nazar aýdarǵan jón»,-dedi A. Samaqova.
