Májilis depýtatyna Memleket basshysynyń Alǵys haty men tósbelgisi tabys etildi
ASTANA. Jeltoqsannyń 9-y. QazAqparat /Aıdyn Báımen/ - Búgin Qazaqstan Respýblıkasy Parlamenti Májilisiniń depýtaty Lıýdmıla Hısaqyzy Hochıevaǵa mereıli jasqa tolýyna oraı Memleket basshysynyń Alǵys haty men tósbelgisi tabys etildi,
dep habarlaıdy QazAqparat.
Palatanyń jalpy otyrysynda depýtat Lıýdmıla Hochıevaǵa Memleket basshysynyń Alǵys haty men tósbelgisin QR Parlamenti Májilisiniń Tóraǵasy Oral Muhamedjanov saltanatty jaǵdaıda tabys etti.
Bul marapat parlamentshige elimizdiń saıası-áleýmettik órkendeýine, ult pen ulystar arasyndaǵy yntymaqtastyqtyń nyǵaıýyna jáne qoǵamǵa asa qajetti zańdardyń qabyldanýyna qosyp kele jatqan úlesi úshin berilip otyr.
Májilis depýtaty L.Hochıeva 1959 jyly qarashanyń 28-inde Jambyl oblysy, Qordaı aýdany, Sharbaqty aýylynda týǵan. 2007 jyly Qazaqstan halqy Assambleıasynan Parlament Májilisiniń depýtaty bolyp saılandy. Qazirgi ýaqytta Májilistiń Zańnama jáne sot-quqyqtyq reforma komıtetiniń múshesi retinde jemisti qyzmet etip keledi.
Qarashaı-balqar mádenı ortalyǵynyń tóraıymy retinde elimizdegi az ulttar ókilderiniń salt-dástúri, mádenıeti men óneri, tili men ádebıetiniń damýyna úles qosyp keledi. Qazaq pen balqar halyqtarynyń arasynda dostyq baılanystyń óristeı túsýi jolynda jáne jastardy ulttyq tárbıege baýlýda eńbek sińirip júr. Birneshe mereıtoılyq medaldarmen jáne «Qurmet» ordenimen marapattalǵan.
