Májilis depýtatyn Saraıshyq qalasyndaǵy tarıhı jádigerler tańǵaldyrdy (FOTO)
Depýtat QazAqparat tilshisine telefon arqyly habarlasyp, óziniń batys óńirindegi kezdesýlerden úlken áser alǵanyn jetkizdi. Áýeli depýtat Atyraý oblysynyń ákimi Baqtyqoja Іzmuhambetovtiń qabyldaýynda boldy. Oblys basshysy parlamentshige óńirdiń tynys-tirshiligi týraly aıtyp berdi. Bul aımaqta negizinen munaı-gaz salasy óndirilip jatsa da, sońǵy jyldary aýyl sharýashylyǵyn damytýǵa basa nazar aýdarylýda. Oblys et, sút ónimderimen, dándi-daqyldarmen ózin-ózi qamtýdy basty maqsat etip qoıyp otyr. Kóptegen kásiporyndar ashylǵan. Ákim óz sózinde qyrkúıek aıynda oblysqa Memleket basshysy arnaıy issaparmen keletini josparlanyp otyrǵanyn málimdedi.
Depýtat A. Begeneev «Nur Otan» partııasynyń Atyraý oblystyq fılıalynda bolyp, onyń jumysymen tanysty. Osy fılıal tóraǵasynyń orynbasary Keńes Qosybaev atqarylyp jatqan saıası-mádenı jumystar jóninde áńgimelep berdi.
Depýtat A. Begeneev Mahambet aýdanynda bolyp, aýyl sharýashylyǵy salasyndaǵy jetistikterdi óz kózimen kórgenin jetkizdi. Mysaly, eshki ósirýmen aınalysyp jatqan pýnktte bolǵanyn aıtty. «Bul jańadan qolǵa alynǵan erekshe joba eken. Jańa zaman kásipkerleri eshkiniń sútin, etin jáne túbitin óndirýmen aınalysýda. Olar jylyna 80 tonna sút, 22 tonna ıogýrt, 15 tonna syr, 5 tonna irimshik, 7 tonna qaımaq jáne 4 tonna et óndirýde. Ekologııalyq taza ónimdermen óńirdiń turǵyndaryn, mektepter men balabaqshalardy qamtamasyz etip otyr. Qazir eshkiniń sany 600 bas, aldaǵy ýaqytta ony bir myńǵa jetkizý josparlanýda. 36 adam jumyspen qamtylǵan eken»,- dedi Andreı Begeneev.
Sonymen qatar depýtat iri qara mal ósiretin sharýashylyqta bolyp, onyń jumysymen de tanysty. Qazir 500 bas iri qara bar, keleshekte onyń basy bir myńǵa jetkizilmek. 42 adam jumyspen qamtylǵan. Depýtat, eń bastysy, mal sharýashylyǵy kesheniniń zamanaýı tehnıkamen qamtylǵanyn jáne onda tártip pen tazalyqtyń saqtalǵanyn aıryqsha atap ótti.
Osy saparynda depýtat «Han Ordaly Saraıshyq» memorıaldyq keshenine baryp, tarıhı oryndy tamashalaý múmkindigine ıe boldy. «Jibek jolynyń boıynda osyndaı tarıhı sáýletti qala bolǵany barsha qazaqstandyqtardyń maqtanyshy dep bilemin. Qazba jumystary júrgizilip jatyr. Saraıshyq qalasynda sý qubyrlarynyń bolǵany, kúmis teńgelerdiń bolǵany tabylǵan jádirgerler arqyly dáleldenip otyr. Sol zamanda osyndaı qalanyń órkendep turǵany meni qatty tańǵaldyrdy. Árıne qırap qalǵany óte ókinishti. Keler jyly ashyq aspan astynda murajaı ashylatynyn estip bildim. Qala ornyn Jaıyq ózeni shaıyp ketpeý úshin beton qabyrǵa ornatý jobasy qolǵa alynǵany da qýantyp otyr»,- dedi depýtat A. Begeneev.
Qalaǵa qaıta oralǵan soń, depýtat «Atyraý sý arnasy» ujymymen kezdesti. Munda sý sharýashylyǵyna qatysty kókeıkesti máseleler talqyǵa salyndy. Sý qubyrlaryn jańartý, zamanaýı tehnologııalardy paıdalanýǵa kóshý, energııany únemdeıtin quraldardy ornatý máseleleri sóz boldy.
Sonymen qatar depýtat keshe Atyraý oblystyq kásipodaq federatsııasynyń múshelerimen júzdesti. Bul kezdesýge 120-dan astam adam qatysty. Májilis depýtaty Parlamenttiń zań shyǵarý qyzmeti, óńirlerdi damytý jáne ekologııalyq jaǵdaıdy jaqsartý jóninde óz oılaryn ortaǵa saldy. Depýtatqa qoıylǵan suraqtar da az bolǵan joq. Ásirese, kásipodaqtyń búgingi tańdaǵy róli týraly ortaq másele kóterildi. Turǵyndar tarapynan kóp jaǵdaıda óz quqyǵyn qorǵaý kezinde jumysshy emes, jumys berýshiler jeńip ketip jatatyny aıtyldy. Depýtat ózi saılanǵanǵa deıin Qaraǵandy oblysyndaǵy «Temirtaý Arselor Mıttal» AQ-nyń kásipodaǵy qandaı qyzmet atqarǵanyn jáne kombınat jumysshylarynyń quqyǵyn qorǵaýdaǵy rólin aıta kelip, tájirıbe almasý qajettigin eske saldy. Depýtat suraqtarǵa jaýap bere kelip, keıbir mınıstrlikterge qatysty máselelerdi ótinish bildirýshilerdiń jazbasha óz atyna jiberýin jáne ony Parlament qabyrǵasynda talqyǵa salatynyn jetkizdi. Kezdesý pikir almasý jaǵdaıynda ótti.
Sondaı-aq depýtat halyqqa qyzmet kórsetý ortalyǵynyń jumysymen tanysty. «Men osy ortalyqta elektrondy úkimet arqyly Eńbek jáne áleýmettik qorǵaý mınıstri Tamara Dúısenovanyń atyna saýal joldadym. Elimizdiń árbir azamaty mınıstrge osylaı óz ótinishin joldaı alatynyn aıttym»,- deıdi depýtat.
Búgin QR Parlamenti Májilisiniń depýtaty, «Nur Otan» partııasy fraktsııasynyń múshesi Andreı Begeneev Atyraý qalasynda birqatar kezdesýler ótkizetinin jetkizdi. Atap aıtqanda, Qazaqstan temir jolynyń oblystyq bólimshesiniń jáne tótenshe jaǵdaılar qyzmetkerlerimen kezdesedi. Shaǵyn jáne orta kásipkerliktiń búgini men keleshegi týraly máseleni óńirdegi kásipkerlermen bolatyn kezdesýde talqyǵa salatyn bolady. Sondaı-aq «Nur Otan» partııasynyń Atyraý oblystyq fılıalynda azamattardy óz ótinishteri boıynsha qabyldaıtynyn málimdedi.