Májilis depýtatyn astanalyq fılarmonııaǵa maman turaqtamaı otyrǵandyǵy alańdatady
ASTANA. Qarashanyń 20-sy. QazAqparat /Aıdyn Báımen/ - Jýyrda Májilis depýtaty Shafqat Ótemisov QR Premer-Mınıstri Kárim Másimovtiń atyna joldaǵan saýalynda astanalyq fılarmonııanyń sımfonııalyq orkestriniń aldynda turǵan ózekti máseleni kóterdi.
Depýtat búgin osy saýaly jóninde QazAqparat tilshisine aıtyp berdi, dep habarlaıdy QazAqparat.
«Bıyl qurylǵanyna 10 jyl tolyp otyrǵan bul orkestrde Astana qalasy ákimdiginiń kómek kórsetýi men demeýshiliginiń arqasynda qazirgi ýaqytta joǵary bilikti mýzykanttar ujymy qalyptasty. Orkestr ár túrli kontsertterde Elordamyz ben memleketimizdiń atynan laıyqty ókildik etedi, óte joǵarǵy kásibı deńgeıdegi is-sharalardy júrgizýge baılanysty jaýapkershilikterdi atqarady. Álemge tanymal juldyzdardyń, mysaly Plasıdo Domıngonyń, taǵy basqalardyń kontsertterin, súıemeldeýge jıi qatysady. Alaıda, sońǵy kezderi orkestrde mýzykanttardyń eńbekaqylarynyń tómen bolýyna baılanysty qıyndyqtar týyndap otyr. Búgingi kúni shtattyq kestege sáıkes 14 jylǵa deıin eńbek ótili bar joǵarǵy deńgeıdegi biliktilikke (G-10 sanaty) jatatyn astanalyq fılarmonııa ártisteri eńbekaqysynyń mólsheri 27 myń 225 teńge», - deıdi Májilis depýtaty Shafqat Ótemisov.
Sonymen qatar sol deńgeıdegi ónerge ıe almatylyq fılarmonııadaǵy áriptesteriniń eńbekaqysy 46 myń 827 teńge. Mundaı aıyrmashylyq sońǵysyna 1,72 quraıtyn joǵarylatý koeffıtsıentiniń mólsherin paıdalaný sebebinen týyndap otyr. Aldaǵy ýaqytta eńbekaqynyń 25 paıyzǵa ósýi alshaqtyqtyń ulǵaıýyna alyp keledi.
Eńbekaqyǵa qoldanylatyn joǵarylatý koeffıtsıentin opera teatrlary, basqa da orkestrler men Memlekettik sımfonııalyq orkestrlerdiń ujymdary paıdalanady.
Qandaı usynys jasaǵandyǵy jaıly suraqqa depýtat: «Osy jaǵdaıdyń nátıjesinde astanalyq fılarmonııa jalaqynyń tómendigine baılanysty respýblıka mýzykanttarynyń arasynda eń bedeli tómen jumys orny bolyp sanalady. Atalǵan jaǵdaıda mamandardyń turaqsyzdyǵy baıqalady. Qyrkúıek aıynyń ózinde orkestrden 5 mýzykant qyzmetten ketti. Bul óz kezeginde ujymnyń shyǵarmashylyq damýyna teris yqpalyn tıgizip, joǵary bilikti mýzykanttardy jumysqa tartýǵa múmkindik bermeıdi. Sondyqtan men Úkimet basshysyna saýal joldap, Astana qalasynyń memlekettik fılarmonııasyn 1.72 joǵary koeffıtsıentin qoldanýmen qarjylandyrylatyn kásiporyndardyń tizimine qosý máselesin qaraýdy ótindim»,- dedi.
