Májilis depýtaty: jumys kúshi tapshy óńirlerge kóship barǵandarǵa bıýrokratııalyq tosqaýyldar kezdesýde
Bul týraly Májilis depýtaty Káribaı Musyrman aıtty, dep habarlaıdy QazAqparat tilshisi.
«Eńbek» memlekettik baǵdarlamasy aıasynda jumys kúshi artyq óńirlerdiń turǵyndary jumys kúshi tapshy óńirlerge qonys aýdaryp jatqany málim. «Qazaqstan-2050» strategııasyna sáıkes qolǵa alynǵan bul áleýmettik baǵdarlama óńirlerdi damytýdaǵy teńgerimsizdik máselesin sheshýge oń yqpalyn tıgizýde. Jumys kúshi tapshy shekaralas óńirlerdegi demografııalyq ahýal birshama jaqsara tústi. Degenmen, Soltústik Qazaqstan jáne Shyǵys Qazaqstan oblystary turǵyndary sanynyń azaıý úrdisi áli jalǵasýda. Máselen, soltústikqazaqstandyqtardyń sany sońǵy 20 jyl ishinde 160 myń adamǵa kemip, qazir 548 myń ǵana bolyp otyr. Óńirge kóship kelýshilerden kóship ketýshiler kóp. Soltústik Qazaqstan oblysyndaǵy demografııalyq ahýaldyń kúrdeliligi aıryqsha kóńil bólýdi qajet etedi. Osyǵan oraı óńirdiń áleýmettik-ekonomıkalyq jaǵdaıy 2018 jyly Tuńǵysh Prezıdentimiz - Elbasy Nursultan Nazarbaevtyń tóraǵalyǵymen ótken Qaýipsizdik keńesiniń otyrysynda arnaıy qaralyp, Úkimetke tıisti tapsyrmalar berilgen bolatyn», - dedi depýtat Májiliste halyqty jumyspen qamtý máseleleri qaralǵan Úkimet saǵatynda.
Onyń aıtýynsha, Soltústik Qazaqstan oblysyn áleýmettik-ekonomıkalyq damytýdyń 2019-2021 jyldarǵa arnalǵan keshendi jospary jasalyp, iske asyrylyp jatyr. Atalǵan óńirge qonys aýdarýshylardy turǵyn úımen qamtamasyz etý boıynsha ilki joba da qolǵa alynǵan.
»Soltústik Qazaqstan oblysynda qalyptasqan jaǵdaıǵa Memleket basshysy Qasym-Jomart Toqaev ta erekshe nazar aýdaryp, qoldaý kórsetýiniń arqasynda bul óńir arnaýly ekonomıkalyq aımaq bolyp aıqyndaldy. Jumys kúshi tapshy óńirlerdegi demografııalyq ahýaldy jaqsartý sharalaryn aldaǵy ýaqytta da jalǵastyrý qajet. Sonymen qatar bizge qonys aýdarýshylardan aldyn ala ýáde etilgen jalaqynyń mólsheri is júzinde álde qaıda az bolyp shyqqandyǵy týraly shaǵymdar túsip turady. Buǵan qosa qonys aýdarýshylardy qabyldaý týraly jalǵan qujat jasap, memleket qarjysyn jymqyrý faktileri áshkerelenip jatyr. Osyǵan oraı qabyldaýshy óńirdegi jumys berýshilerdiń qonys aýdarýshylardy qabyldaýyna jáne sharttyq mindettemelerin oryndaýyna júıeli monıtorıng júrgizgen jón«, - dedi ol.
Májilis depýtaty munan bólek, qonys aýdarýshylar óz otbasylaryna memlekettik bıýdjetten bólinetin materıaldyq kómek qarjysyn kóship barǵan óńirlerinde turaqty tirkeýge turmaıynsha ala almaıtyndyqtaryna shaǵymdanyp jatqanyn aıtty.
»Munyń ózi olardyń tirkelýine qajetti turǵyn-jaıdy satyp alýyn qıyndatyp jibergen paradoks jaǵdaı bolyp shyqty. Eńbek jáne halyqty áleýmettik qorǵaý mınıstrligi qonys aýdarýshylardyń kóship barǵan óńirlerine tezirek beıimdelýine teris áserin tıgizip otyrǵan bıýrokratııalyq tosqaýyldardy boldyrmaýy qajet«, - dedi Káribaı Musyrman.
