Májilis depýtaty jol apatynan qaza tapqandar sany qaı óńirlerde joǵary ekenin aıtty
«Memleket basshysy 2022 jylǵy 14 shildede ótken Úkimettiń keńeıtilgen otyrysynda jol qurylysy salasyn reformalaý jáne 1 qyrkúıektegi Joldaýynda avtojol qurylysyna 2025 jylǵa deıin jergilikti joldardyń keminde 95 paıyzyn jaqsartý týraly tapsyrma bergen bolatyn.
Depýtattyń sózine qaraǵanda, Úkimet pen memlekettik organdar jaǵynan birqatar jol qurylysy boıynsha jobalarǵa ýaqytyly sheshim jasalmaı otyr. Osy oraıda bıýrokratııaǵa jol berilip, jumsalǵan qarajat jerge kómilip, jumystar aıaqtalmaı jatyr.
«Merdiger kompanııalar júk tasymaldaǵysh vagondardyń jetispeýshiligi, qurylys materıaldary men bıtým tapshylyǵy, ınflıatsııanyń áseri keri yqpal etip otyrǵanyn aıtyp otyr. Bul turǵyda kompanııalardyń ýájderin durys dep sanaımyz, óıtkeni onymen Úkimet aınalysýy kerek. Sapasyz salynǵan joldardyń jaǵdaıy bizdegi sybaılas jemqorlyq pen salǵyrttyqtyń jáne talapsyzdyqtyń saldarynan bolyp otyr. 2022 jyldyń 8 aıynda respýblıka joldarynda 9 430 jol-kólik oqıǵasy tirkelgen. Onyń saldarynan 1 480 adam qaza taýyp, 12 400 adam jaraqat alǵan. Bul kórsetkish jyl saıyn ósip keledi», - dedi Samat Musabaev QR Premer-Mınıstriniń birinshi orynbasary Roman Sklıardyń atyna joldaǵan saýalynda.
Onyń aıtýynsha, jol-kólik oqıǵalarynan qaza tapqandar sany Qaraǵandy, Mańǵystaý jáne Qyzylorda oblystarynda basqa óńirlermen salystyrǵanda joǵary.
«Batys Eýropa - Batys Qytaı» avtomobıl dáliziniń jalpy uzyndyǵy 2 787 shaqyrymdy quraıdy. Bıylǵy 8 aıda atalǵan dálizde 317 jol-kólik oqıǵasynan 147 adam qaza taýyp, 560 adam jaraqat alǵan. Qarajat tapshylyǵynan jáne aralyq jóndeý merzimderin saqtamaǵandyqtan osyndaı jaǵdaı bolyp otyr», - dedi depýtat.
Osy oraıda ol Úkimetten birqatar suraqqa jaýap berýdi surady.
«Memleket basshysynyń bergen tapsyrmalary qashan iske asyrylady ? Júk vagondary máselesi, bıtým tapshylyǵy jáne joba qunyn túzetý máseleleri qashan sheshilmek? Avtomobıl joldarynyń ınfraqurylymy qashan talapqa sáıkestendirilmek?», - dedi Samat Musabaev.