Májilis depýtaty: Jastar zańger nemese ekonomıst emes, ınjener bolýǵa talpynady

ASTANA. QazAqparat - Qazaqstanda jastarǵa laıyqty bilim men baspana máselesin sheshýde ońtaıly qadam bastaldy. Bul týraly QR Parlamenti palatalarynyń birlesken otyrysynan keıin Májilis depýtaty Omarhan Óksikbaev málim etti, dep habarlaıdy QazAqparat.

«Árıne, jastarmyzdyń kóbisindegi úlken máseleniń biri baspanaǵa qatysty. Baspana bolmasa, istep jatqan isiniń berekesi de baıqalmaıtyny anyq. Sondyqtan bul jaǵdaıdy sheshýde úlken tapsyrma berilgeni túsinikti. 7 paıyz degen óte qoljetimdi. Onyń ústine bastapqy jarnany baspana qunynyń 20 paıyzdan asyrmaý týraly bastama orta tabysty turǵyndardyń ıpotekaǵa múmkindikterin arttyrady. Sonymen qatar nesıe merzimi 25 jylǵa jetkizilse, baspana alýǵa nıetti biraz adamnyń máselesi sheshiler edi», - dedi depýtat.

Budan bólek ol aldaǵy oqý jylyna qosymsha granttar bólý týraly bastamaǵa toqtaldy.

«Búginge tańda elimizde ınjenerlik mamandardyń tapshylyǵy bar. Bul salada da sheshimin jasaıtyn jumystar jeterlik. Sondyqtan Prezıdent osy baǵytqa granttardy kóbeıtip, múmkindiginshe grant ıelengen jastardyń qataryn arttyrýdy tapsyryp otyr. Ózderińiz bilesizder, elimizde ınjener mamandar tapshy. Al ekonomıster men zańgerler osyǵan deıin de kóp kezdesetin. Endi búgingi bastamalardyń nátıjesinde joǵary bilim salasynda ońtaıly ózgerister bolatyny anyq», - dedi depýtat.

Onyń paıymynsha, osy oraıda shetelge oqýǵa baratyndar bakalavrlyq bilim boıynsha Qazaqstan aýmaǵyndaǵy JOO-larǵa betburys jasaıdy.

Budan buryn habarlanǵandaı, QR Parlamenti palatalarynyń birlesken otyrysynda Elbasy Nursultan Nazarbaev «Prezıdenttiń bes áleýmettik bastamasy» atty halyqqa úndeýin jarııa etti.