Májilis depýtaty UBT tártibin ózgertip, test tapsyrmalaryna ashyq suraqtar engizýdi usyndy

Búgin Parlament Májilisiniń jalpy otyrysynda Úkimet basshysynyń atyna saýal joldaǵan depýtat Tursynbek Ómirzaqov osy máseleni kóterdi.

Depýtattyń aıtýynsha, Ulttyq biryńǵaı testileý - bul mektepti bitirý jáne oqýǵa túsý emtıhandaryn tolyǵymen almastyryp otyrǵan bilimdi baǵalaý júıesi. ıAǵnı, túlekterdiń joǵary oqý oryndaryna túsýi UBT nátıjesindegi balǵa tikeleı baılanysty. Osyǵan oraı, Ulttyq biryńǵaı testileýdiń ótken jyldardaǵy tájirıbelerine, bilimdi baǵalaýdyń osy tásiliniń álemdik tájirıbede qoldanylýyna, sondaı-aq bul máselege qoǵamnyń alańdaýshylyǵyna toqtala kele depýtat júıeni jetildirýdiń birqatar usynystaryn alǵa tartty. «Erejege sáıkes, apellıatsııalyq komıssııa aryzdardy test nátıjeleri belgili bolǵan kúnniń ertesinde saǵat 14.00-ge deıin qabyldaıdy. Komıssııa mindeti test nátıjesiniń ádildigin qamtamasyz etý jáne oǵan senimdi arttyrý. Osyǵan baılanysty apellıatsııa merzimin UBT nátıjeleri jarııalanǵannan keıin kem degende 2 jumys kúnine deıin uzartý qajet», - deıdi depýtat.

Onyń aıtýynsha, test mazmuny da jetildirýdi qajet etedi.

«Joǵary oqý ornyna túsýge quzyrettilik pen bilim deńgeıin baǵalaý, onyń ishinde memlekettik grantqa ıelenetin túlekterdiń logıkalyq oılaý qabileti men pánder boıynsha bilimi saı ekendigine kóz jetkizý qajet. Sondyqtan da, testileýde túlekterdiń óz ustanymyn dáleldeýdi talap etetin ashyq suraqtar bolýy tıis. Bul baǵalaý sapasyn arttyrady», - dedi T.Ómirzaqov. Onyń aıtýynsha, suraqtardyń birneshe túrlerin (testileý, ashyq suraqtar men esseler) paıdalaný tájirıbesi Reseıde, Ulybrıtanııada, AQSh-ta keńinen qoldanylady. «Bul rette ashyq suraqtar engizý qoldaý tabatyn bolsa, jekelegen pánderden synaq tapsyrýdy ártúrli kúnderge belgileýdi qarastyrǵan abzalyraq», - deıdi T. Ómirzaqov.

Budan bólek, depýtat saýal barysynda jergilikti jerlerde testileý barysynda túrli sıpattaǵy quqyq buzýshylyqtarǵa jol beriletinin aıtyp, mundaı faktiler UBT mártebesin tómendetetinin atap ótti. Budan bólek, ondaı faktiler UBT-nyń teńdeı jaǵdaıdy qamtamasyz etpeı otyrǵanyn kórsetedi. «Sondyqtan da, ádil UBT-ny qoldaý úshin resmı saıt ashyp, onda aqparattar tolǵymen qamtamasyz etilýi kerek», - dedi depýtat.