Májilis depýtaty UBT-daǵy ádiletsizdik máselesin kóterdi
ASTANA. QazAqparat - 11 jyl boıy kileń beske oqyǵan bala, testileýdiń negizgi pániniń bárinen bes alsa, «Altyn belginiń» úmitkerine orys nemese qazaq tili páni nege kedergi bolýǵa tıis.
Búgin Májilistiń jalpy otyrysynda Úkimet basshysynyń atyna saýal joldaǵan depýtat Gúlmıra Isimbaeva osy máseleni kóterdi.
Májilis depýtatynyń aıtýynsha, Ulttyq biryńǵaı testileýdi ótkizý byltyrǵy jyldarǵa qaraǵanda bıyl jaqsaryp qalǵan. Alaıda, jekelegen problemalar da joq emes.
«Májilis depýtattary orys tilinde oqytatyn mektep túlekteri úshin qazaq tili boıynsha, qazaq tilinde oqytatyn mektep túlekteri úshin orys tili boıynsha alǵan balyn UBT kezindegi grantqa ený barysynda eskerý qajettiligi týraly máseleni ártúrli deńgeıde birneshe ret kóterdi. Alaıda, ol sheshimin tappady. Osy pánder boıynsha alǵan ball bilim berý grantyn ıelenýge arnalǵan konkýrsta eskerilmeıdi. Al tómendegen kezde, bul eskeriledi. ıAǵnı, kórsetkishti joǵarylatatyn kezde ball eseptelmeıdi, kórsetkishti tómendetken kezde mindetti túrde esepke alynyp otyr», - deıdi depýtat G. Isimbaeva.
Depýtattyń sózine qaraǵanda, Almaty qalasy M. Maqataev atyndaǵy 140-mektep-gımnazııasynyń oqýshysy, «Altyn belgi» úmitkeriniń ata-anasynan dál osy problemaǵa qatysty hat kelgen. Onda túlek tórt pánnen: Qazaqstan tarıhy, matematıka, qazaq tili, aǵylshyn tili páninen joǵary ball jınaǵan. Al qazaq mektebindegi orys tili páni boıynsha oqýshynyń «Altyn belgige» bir baly jetpeı qalyp otyr. «Oqýshy bul rette Ulttyq biryńǵaı testileýde berilgen tapsyrmadaǵy tynys belgisi qoıylmaǵandyqtan qateleskendigin aıtyp, apellıatsııalyq komıssııaǵa da ótinish jasaǵan. Rasynda da, tapsyrmanyń jaýabynda tıisti syzyqsha belgisi qoıylmaǵany belgili boldy. Sóıtip, test tapsyrmasyndaǵy qatelik jaýaptyń durys bolmaýyna soqtyryp otyr. Sondyqtan da, oqýshynyń talabyn eskerip bir ball qosýǵa bolar edi. Alaıda, apellıatsııalyq komıssııa oqýshynyń ótinishin qaramaǵan», - deıdi depýtat.
Bul rette G. Isimbaeva dál osyndaı jaǵdaıdyń kóptep kezdesetinin alǵa tartady. Onyń aıtýynsha, 11 jyl boıy kileń beske oqyǵan bala, testileýdiń negizgi pániniń bárinen bes alsa, «Altyn belginiń» úmitkerine orys nemese qazaq tili páni nege kedergi bolýǵa tıis.
«Bul pán bilim berý grantyn alýǵa eskerilmeıtini sekildi, «Altyn belgi» alý úshin de eskerilmeýi kerek. Sonda ǵana ádildik bolar edi», - dedi depýtat.
Budan bólek, G. Isimbaeva apellıatsııalyq komıssııalar aldaǵy ýaqytta óz mindetine jaýapkershilikpen qaraýy tıistigin aıtty. Onyń sózine qaraǵanda, suraqtardaǵy tynys belgileri, baspadaǵy basqa da qateler bala taǵdyryna áser etetinin eskerip, bilikti mamandar retinde ádil sheshimder shyǵarýlary kerek. «Ásirese, «Altyn belgi alýǵa 1 ball, keıbir jaǵdaılarda 2 ball jetpeı jatqan balalardyń jumystary óte muqııat qaralyp, kúmándi jaǵdaıdyń bári oqýshynyń paıdasyna sheshilýi tıis», - dedi Májilis depýtaty.
