Májilis depýtaty Ýálıhan Qaınazarovtyń Sozaq aýdany aktıvimen kezdesýinde birqatar túıtkildi máseleler aıtyldy
ShYMKENT. QazAqparat - QR Parlamenti Májilisiniń depýtaty Ýálıhan Qaınazarov Ońtústik Qazaqstan oblysyndaǵy Sozaq aýdanyna saparlady.
Teriskeı halqynyń tynys-tirshiligimen tanysqan halyq qalaýlysy birqatar qurylys nysandaryn aralady. Elbasy joldaýyn nasıhattap, «Ult jospary - 100 naqty qadam» jobasynyń oryndalý barysyn baǵamdady, dep habarlaıdy «QazAqparat HAA tilshisi.
Depýtat aldymen, Túrkistan-Sozaq aınalma jol qurylysymen tanysty. Eni 7 metr, uzyndyǵy 7 shaqyrymǵa sozylatyn bul joldy salý úshin aýdandyq bıýdjetten 326 mln teńge bólingen. Qurylys jumystary kúz sońyna deıin aıaqtalýy tıis.
Al, Sozaqtaǵy eń sáýletti nysandardyń biri Táýelsizdik saıabaǵy bolashaqta shejire-tarıh tunatyn oryn bolmaq. Onyń qurylysyn kórip shyqqan Ýálıhan Qaınazarov aýdan ákimi Salyhan Polatovpen birge alǵashqy irgetasyn qalady. Nysandy salyp jatqan qurylysshylarmen tildesip, saıabaqty salýda sapaǵa bekem bolý qajettigin aıtty.
Іssapar sońynda halyq qalaýlysy aýdan aktıvimen kezdesip, birqatar máseleler jaıyn sóz etti. Teriskeılik jurttyń sheshimin tappaı otyrǵan máselelerin tyńdap, qolushyn sozýǵa ýáde etti.
