Májilis depýtaty tólebılik kásipkerlermen kezdesti
LEŃGІR. QazAqparat – Búgin Májilis depýtaty, «Nur Otan» partııasy fraktsııasynyń múshesi Ýálıhan Qaınazarov Tólebı aýdanyna arnaıy is-saparmen keldi. Halyq qalaýlysy aýdandyq kásipkerlik mektebiniń ǵımaratynda kásipkerlermen jáne jergilikti turǵyndarmen kezdesti, dep habarlaıdy QazAqparat tilshisi.
Depýtat óz sózinde kásipkerlikti qoldaý men damytý, kásipkerlerge arnalǵan jeńildikter týraly aıtyp ótti. Sonymen qatar, qatysýshylardan jumys barysynda kezdesip jatqan túıtkildi máseleler jóninde surap, keıbir memlekettik baǵdarlamalardy ózgertýge nemese jańadan engizýge bolatyn usynystardy aıtýyn surady.
Kásipkerler tarapynan jumys barysynda jumys kúshiniń azdyǵy, aýyl sharýashylyǵyndaǵy keıbir baǵdarlamalardy qaıta qarap, óńdeýler engizilse, shaǵyn sharýa qojalyqtary kooperatıvterge birigip jumystar atqarylsa dep óz oılaryn jetkizdi. Aıtylǵan máselelerdi muqııat tyńdaǵan QR Parlament Májilisiniń depýtaty Ýálıhan Qaınazarov kásibin dóńgeletip júrgen azamattardyń ótinish-tilekterin tıisti oryndarǵa jetkizetinin aıtty.
Aıta keteıik, búginde Tólebı aýdanynda demalys oryndary kóptep ashylyp, týrızm salasy qarqyndy damyp keledi. Aýdandaǵy kásipkerler sondaı-aq, mal basyn kóbeıtýdi qolǵa alǵan. Nátıjesinde et jáne sún ónimderi shyǵarylyp, alys-jaqyn qalalar men shetelderge saýdalanýda. Memleket tarapynan kórsetilip jatqan qoldaýlardyń arqasynda aýyl sharýashylyǵy salasy damyp, egistikterden mol ónim alynýda.
