Májilis depýtaty: «Til týraly» zańdy oryndaý - azamattyq paryz

Tıisti oqytý ortalyqtary, sózdikter, ádistemelik qoldanbalar, barlyǵy bar. Tek qana endi Qazaqstannyń árbir azamatynyń «Til týraly» zańdy oryndaýy ǵana qaldy. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte QR Parlamenti Májilisiniń depýtaty, Qazaqstan halqy Assambleıasynyń múshesi Rozaqul Halmuradov málim etti.

Onyń aıtýynsha, Qazaqstan halqy Assambleıasy «Til daryn» atty baǵdarlama engizgen. Ol Reseıdiń ataqty lıngvısi Dmıtrı Petrovtyń ádistemesi arqyly jasaldy. Sol baǵdarlamanyń kómegimen tek óz elimizdiń azamattary ǵana emes, shetel elshilikteriniń qyzmetkerleri de memlekettik tildi úırenýde.

«Qazaqstan ózbekteriniń dostyq qaýymdastyǵy osydan 7-8 jyl buryn ózbek tilinde sabaq beretin mektepterde keıbir pánderdi qazaq tilinde oqytý jobasyn engizgen. Onda Qazaqstan tarıhy, bıologııa jáne basqa da keıbir sabaqtar qazaq tilinde oqytylady. Keıbir jerin túsinbegenderge ózbek tilinde túsindiriledi. Osy jobaǵa qatysqan eki mekteptiń oqýshylary jobaǵa deıin tek 10-15 paıyzy ǵana memlekettik granttarǵa ilikse, osy joba engizilgennen keıin bul kórsetkish 85 paıyzǵa jetken», - degen mysal keltirdi depýtat.

Onyń aıtýynsha, 2009 jyly Astanada osy máselege qatysty ǵylymı konferentsııa ótkizilip, Bilim jáne ǵylym mınıstrligine joǵaryda atalǵan joba usynylǵan. «Memlekettik tilden basqa tilderde sabaq beretin mektepterge keıbir pánderdi qazaq tilinde júrgizeıik dedik. Ókinishke qaraı, bul usynys mınıstrlik tarapynan áli kúnge deıin qoldaý tappaı keledi. Degenmen, 2015 jyldan bastap sol jobany basqa mektepterge de engizemiz dep jatyr», - dep atap ótti R. Halmuradov.

Onyń aıtýynsha, bul jerde sheshilmegen bir-aq másele bar. Ol - sol mekteptiń muǵalimderin qazaq tilinde sabaq júrgizýge qaıta daıarlaý. «Osy másele sheshilse, jalpy halyqtyń, ata-analardyń, oqýshylardyń arasynda qoldaıtyndar óte kóp, - dep qorytyndylady halyq qalaýlysy.