Májilis depýtaty ShQO-da saılaýshylarmen kezdesýler ótkizdi
ASTANA. QazAqparat - Osy kúnderi Parlament Májilisiniń depýtaty, «Nur Otan» partııasy parlamenttik fraktsııasy jetekshisiniń orynbasary, Ekonomıkalyq reforma jáne óńirlik damý komıtetiniń tóraǵasy Nurtaı Sabılıanov Shyǵys Qazaqstan oblysynda saılaýshylarmen kezdesýler ótkizdi, dep habarlaıdy QR Parlamenti Májilisiniń baspasóz qyzmeti.
Baspasóz málimetterine qaraǵanda, depýtat Aıagóz aýdanynyń Aıagóz qalasynda, Aqtoǵaı kentinde jáne Qopa, Tarlaýly aýyldarynda, Úrjar aýdanynyń Úrjar, Maqanshy, Baqty, Qyzyltý, Eltaı jáne Segizbaı aýyldarynda kezdesýler ótkizdi.
Kezdesýlerde depýtat N.Sabılıanov saılaýshylarǵa Qazaqstan Respýblıkasy Parlamentiniń zań shyǵarý qyzmeti týraly aıtyp, Memleket Basshysy N.Á.Nazarbaevtyń bes áleýmettik bastamasynyń qazaqstandyqtarǵa úlken mańyzy bar ekendigin túsindirdi jáne olardy júzege asyrýdyń mindetteri týraly aıtyp berdi.
Saılaýshylar óz kezeginde aýyzsýmen, turǵyn úımen qamtamasyz etý, avtojoldardy jóndeý, halyqty jumyspen qamtý, áleýmettik qamsyzdandyrý, aýyl sharýashylyǵyn damytý, shaǵyn nesıeleý, bilim salasyn jaqsartý, dári-dármektermen ýaqtyly qamtamasyz etý, ınternet-baılanysyn damytý, shekaralyq eldi-mekenderdiń ınfraqurylymyn damytý jáne basqa da máselelerdi kóterdi.
Sonymen qatar, depýtat Nurtaı Sabılıanov 1 sáýir kúni Aıagóz qalasynda azamattardy qabyldaý kúnin ótkizip, 120 adamdy qabyldady. Onyń ishinde kópshiligi sý tasqynynan zardap shekken turǵyndar boldy. Barlyq azamattarǵa depýtat tarapynan jaýaptar men túsindirmeler berildi.
Odan ári depýtat N.S. Sabılıanovtyń turǵyndarmen kezdesýleri Shyǵys Qazaqstan oblysy Abaı, Jarma aýdandarynyń eldi-mekenderinde jalǵasady.
