Májilis depýtaty Serik Ospanov QR ІІM Kóliktegi ІІD janyndaǵy Qoǵamdyq keńestiń tóraǵasy bolyp saılandy
ASTANA. QazAqparat - Búgin, ıaǵnı 4 shilde kúni QR ІІM Kóliktegi ishki ister departamentiniń janyndaǵy Qoǵamdyq keńestiń otyrysy ótti. Oǵan quramynda belgili qoǵam qaıratkerleri bar keńes músheleri, depýtattyq korpýstyń ókilderi jáne departament basshylyǵy qatysty.
Bul týraly Kóliktegi ІІD baspasóz qyzmeti habarlady.
Bul jańa quramda ótkizilip otyrǵan keńeıtilgen alǵashqy otyrysy. Eń aldymen, Kóliktegi ІІD bastyǵy, polıtsııa polkovnıgi Berik Bısenqulov Qoǵamdyq keńestiń jańa múshelerin tanystyrdy. Budan soń, Qoǵamdyq keńestiń jańa tóraǵasy bolyp QR Palamenti Májilisiniń depýtaty Serik Ospanov saılandy.
Polıtsııa polkovnıgi Berik Bısenqulov: «Qoǵamdyq keńes qurylǵannan bergi ýaqytta óziniń tıimdiligin dáleldedi. Eń bastysy, polıtseıler men azamattar arasyndaǵy baılanysty nyǵaıtatýǵa úles qosty», - dep atap ótti. Sondaı-aq, Berik Baıboluly QR Prezıdenti N.Á. Nazarbaevtyń Qazaqstan halqyna Joldaýyndaǵy basty mindetterge, Elbasynyń ishki ister organdary salasy qyzmetkerleriniń aldyna qoıǵan tapsyrmalarynyń oryndalý barysyna toqtaldy.
Óz kezeginde Keńes tóraǵasy Serik Ospanov Qoǵamdyq keńes polıtseıler men azamattardyń ózara qarym-qatynasyn nyǵaıtý baǵytynda jumys jasaýy qajettigin aıtty. «Ásirese, normatıvtik-quqyqtyq aktiler jobalaryn talqylaýda keńes músheleriniń quzyretin barynsha keńeıtý kerek», - dedi halyq qalaýlysy.
Budan soń, departament bastyǵynyń orynbasary, polıtsııa polkovnıgi Janatbek Eshimov baıandama jasady. Ol temir jol jáne áýekóligi nysandaryndaǵy qoǵamdyq qaýipsizdikti saqtaýda atqarylyp jatqan sharalardy baıandady. Onyń aıtýynsha, osy nysandarda azamattar ózderin qaýipsiz sezinýleri tıis. Sondaı-aq, J. Eshimov atalmysh nysandarǵa qatysty birqatar problemalyq máselelerge de jan-jaqty toqtaldy.
Elimizdiń temir jol vokzaldary men áýejaılarynda arnaıy jáne quqyq qorǵaý organdary júrgizgen tájirıbeler azamattardy lańkestik áreketterden qorǵaý sharalaryn áli de bolsa kúsheıtý qajettigin dáledep otyr. Máselen, Astana, Almaty, Aqtaý, Atyraý, Aqtóbe, Qaraǵandy qalalaryndaǵy áýejaılarda ornatylǵan beıne-baqylaý kameralary tıisti talaptarǵa saı ornalastyrylǵan. Alaıda, Balqash, Petropavl, Semeı, Kókshetaý qalalaryndaǵy áýejaılar beıne-baqylaý júıelerimen tolyqtaı jabdyqtalmaǵan. Olardyń qaýip tóndiretin aýmaqtardy sholý múmkindigi álsiz. Baıandamada jańadan salynyp jatqan temir jol aýmaqtarynda kólik polıtseılerin ornalastyrý máselelerin sheshý isi ózekti bolyp otyrǵandyǵy aıtyldy. Mundaı aýmaqtarda jelilik polıtsııa bólinisteriniń qyzmetkerleri úshin arnaıy qyzmettik bólmeler qarastyrylmaǵan.
Aıtalyq, júkterdi saqtaýdy qamtamasyz etý, jeke múlikterdi urlaýdyń aldyn alý jáne qoǵamdyq qaýipsizdikti qorǵaý maqsatynda Altynkól stansasynda quramynda 25 qyzmetker bar jelilik polıtsııa bólimi quryldy. Ókinishke oraı, Altynkól stansasyndaǵy temir jol vokzalyndaǵy jelilik polıtsııa bólimine kólemi 12 sharshy metr ǵana bolatyn bólme berilgen. Bul oryn qyzmetkerlerdi ornalastyrýǵa jetkiliksiz.
Osyndaı olqylyqtardyń aldyn alý maqsatynda qurylysy júrgizilip jatqan «Ózen-Bolashaq, Jezqazǵan-Sekseýil-Shalqar-Beıneý» temir jol boıyndaǵy stansalarǵa kóliktegi ishki ister organdarynyń jumysyn uıymdastyrý úshin qyzmettik oryn men polıtseılerge baspana berý máselesin de qarastyrý qajet.
Basqosý barysynda Serik Jámekuly kezdesýge qatysýshylardy Qoǵamdyq keńestiń 2014 jyldyń ІІ-shi jartyjyldyǵyna arnalǵan jumys josparymen tanystyrdy.
Otyrysta qoǵamdyq tártipti kúsheıtý, tártip pen zańdylyqty nyǵaıtý, jeke quram arasyndaǵy sybaılas jemqorlyqty boldyrmaý máseleleri talqylandy.
Jıyn qorytyndysy boıynsha Qoǵamdyq keńes ókilderi departament qyzmetine qatysty sheshimder men usynystar qabyldady.
Aıta keteıik, Kóliktegi ІІD janyndaǵy Qoǵamdyq keńes 2012 jyldyń 13 jeltoqsanynda qurylǵan. Onyń quramynda belgili qoǵam qaıratkerleri men jýrnalıster bar.
Qoǵamdyq keńes qyzmetiniń maqsattary qoǵamdyq tártipti qorǵaý júıesiniń tıimdiligin arttyrý jáne qoǵamdyq qaýipsizdikti qamtamasyz etý, quqyq buzýshylyqtyń aldyn alý, Kóliktegi ІІD-niń úkimettik emes uıymdarmen jáne halyqpen ózara qarym-qatynasyn odan ári jetildirý, quqyq qorǵaý qyzmeti salasynda qoǵamdyq qatynastardy demokratııalandyrýý bolyp tabylady.
